ഇന്ത്യയിൽ നിന്ന് തിരിച്ച 54  ഇസ്കോൺ സന്യാസിമാരെ തടഞ്ഞ് ബംഗ്ലാദേശ്. യാത്ര രേഖകൾ കൈവശം ഉണ്ടായിരുന്നിട്ടും ബെനാപോൾ അതിർത്തി ചെക്ക് പോസ്റ്റിന് സമീപമാണ് സന്യാസിമാരെ ബം​ഗ്ലാദേശ് പൊലീസ് തടഞ്ഞത്. മണിക്കൂറുകൾ നീണ്ട കാത്തിരിപ്പിനൊടുവിലാണ് സന്യാസിമാരോട് യാത്രാ അനുമതി ഇല്ലെന്ന വിവരം അറിയിക്കുന്നത്. സംശയാസ്പദമായ യാത്ര എന്ന ആരോപണത്തിലാണ് അനുമതി നിഷേധിച്ചത്. മതപരമായ ആചാരങ്ങൾക്കായി ഇന്ത്യയിലേക്കുള്ള യാത്രയുടെ ഭാ​ഗമായാണ് ബം​ഗ്ലാ​ദേശിന്റെ വിവിധ ഭാ​ഗങ്ങളിൽ നിന്ന് ഇസ്കോൺ സന്യാസിമാരുടെ സംഘം അതിർത്തിയിൽ എത്തിയത്. സംഘത്തെ ഇന്ത്യയിലേക്ക് കടക്കാൻ അനുവദിക്കരുതെന്ന് ഉന്നത ഉദ്യോഗസ്ഥരിൽ നിന്ന് നിർദ്ദേശം ലഭിച്ചിട്ടുണ്ടെന്ന് ഇമി​ഗ്രേഷൻ പൊലീസ് ഉദ്യോ​ഗസ്ഥർ പറഞ്ഞു.

ബം​ഗ്ലാദേശിൽ ഇസ്കോണുമായി ബന്ധപ്പെട്ട പ്രമുഖരെ അറസ്റ്റ് ചെയ്യുകയും ബാങ്ക് അക്കൗണ്ടുകൾ മരവിപ്പിക്കുകയും ചെയ്തതിന് പിന്നാലെയാണ് ഈ സംഭവം. കഴിഞ്ഞ ദിവസമാണ് ഇസ്കോൺ അംഗങ്ങളായ രണ്ട് പേരെ പൊലീസ് കസ്റ്റഡിയിലെടുത്തത്. കൂടാതെ 17 പേരുടെ ബാങ്ക് അക്കൗണ്ടുകൾ മരവിപ്പിക്കുകയും ചെയ്തിരുന്നു. നേരത്തെ അറസ്റ്റിലായിരുന്ന ഹിന്ദു സന്യാസി ചിന്മോയ് കൃഷ്ണദാസിന്റെ പ്രവർത്തനങ്ങളിൽ പങ്കാളിയായവർക്കെതിരെയാണ് നടപടിയെന്നായിരുന്നു വിശദീകരണം.

ഇസ്കോണിനെ നിരോധിക്കണമെന്ന ബം​ഗ്ലാദേശ് സർക്കാരിന്റെ ആവശ്യം മുമ്പ് ബം​ഗ്ലാദേശ് ഹൈക്കോടതി തള്ളിയിരുന്നു. ബംഗ്ലാദേശിലെ പ്രമുഖ ഹിന്ദുമത നേതാവും ഇസ്കോൺ സന്യാസിയുമായി ചിന്മോയ് കൃഷ്ണദാസിന്റെ അറസ്റ്റുമായി ബന്ധപ്പെട്ട് സംഘർഷങ്ങൾ ശക്തമാവുന്ന സാഹചര്യത്തിലായിരുന്നു ബം​ഗ്ലാദേശ് ഇത്തരമൊരു ആവശ്യം ഉന്നയിച്ചത്. ചിന്മോയ് കൃഷ്ണദാസിന്റെ അറസ്റ്റിൽ ഇന്ത്യ ആശങ്ക പ്രകടിപ്പിക്കുകയും ന്യൂനപക്ഷത്തെ സംരക്ഷിക്കണമെന്ന് ആവശ്യപ്പെടുകയും ചെയ്തിരുന്നു. ഇന്ത്യയുടെ ഈ ആവശ്യത്തിന് മറുപടിയായി തങ്ങളുടെ ആഭ്യന്തര കാര്യങ്ങളിൽ ഇന്ത്യ ഇടപെടേണ്ടെന്ന് ബം​ഗ്ലാദേശ് വിദേശകാര്യ മന്ത്രാലയം പറഞ്ഞു.