സിനിമയെ സിനിമയായി തന്നെ കാണണമെന്നും സിനിമ വിനോദത്തിനു വേണ്ടിയുള്ളതാണെന്നും നടന്‍ ആസിഫ് അലി പറഞ്ഞു. ജീവിച്ചിരിക്കുന്നവരോ മരിച്ചവരോ ആയി ബന്ധമില്ലെന്നും സാങ്കല്‍പികമാണെന്നും എഴുതിക്കാണിക്കുന്നതിനെ അങ്ങനെ തന്നെ കാണണമെന്നാണ് തന്റെ ആഗ്രഹമെന്നും അദ്ദേഹം എമ്പുരാന്‍ സിനിമ വിവാദത്തില്‍ മാധ്യമങ്ങളോട് പറഞ്ഞു.

രണ്ടര മൂന്ന് മണിക്കൂറുള്ള വിനോദത്തിനായി മാത്രം സിനിമയെ കാണണമെന്നും അദ്ദേഹം കൂട്ടിച്ചേര്‍ത്തു.

സിനിമ എത്രത്തോളം സ്വാധീനിക്കണമെന്ന് തീരുമാനിക്കാന്‍ പറ്റുന്നത് നമുക്കാണെന്നും ആ തീരുമാനം നമ്മുടെ കൈയിലായിരിക്കണമെന്നും ആസിഫ് പറഞ്ഞു. സിനിമയായാലും നമ്മുടെ ചുറ്റുപാടുകളായാലും നമ്മളെ സ്വാധീനിക്കാന്‍ പറ്റുന്നത് എന്താണെന്ന് നമുക്ക് തിരഞ്ഞെടുക്കാമെന്നും അദ്ദേഹം കൂട്ടിച്ചേര്‍ത്തു.

സോഷ്യല്‍ മീഡിയ ആക്രമണം എന്നത് ഒരു തവണ അനുഭവിച്ചാലേ അറിയുകയുള്ളൂവെന്നും ആസിഫ് പറഞ്ഞു. വീട്ടില്‍ ഇരുന്ന് അല്ലെങ്കില്‍ കൂട്ടുകാര്‍ക്കൊപ്പമിരുന്ന് സാമൂഹ്യമാധ്യമത്തില്‍ എഴുതുമ്പോള്‍ വരുംവരായ്കളെക്കുറിച്ച് ചിന്തിക്കുന്നില്ലെന്നും അദ്ദേഹം പറഞ്ഞു.

നേരിട്ട് അഭിപ്രായം പറയാന്‍ ധൈര്യമില്ലാത്തവര്‍ ഒളിച്ചിരുന്ന് പറയും. ഇത് ഒളിച്ചിരുന്ന് കല്ലെറിയുന്നത് പോലെയാണെന്നും അതിന്റെ വകഭേദമാണ് സാമൂഹ്യമാധ്യമത്തില്‍ കാണുന്നതെന്നും ആസിഫ് പറഞ്ഞു.