.jpg)
പി വി അന്‍വര്‍ എംഎല്‍എയുടെ ആരോപണങ്ങള്‍ അന്വേഷിക്കാന്‍ തീരുമാനം
പി.വി അന്‍വര്‍ എംഎല്‍എയുടെ എല്ലാ ആരോപണങ്ങളും അന്വേഷിക്കാന്‍ പ്രത്യേക അന്വേഷണ സംഘത്തിന് ഡിജിപി നിര്‍ദ്ദേശം നല്‍കി. വസ്തുനിഷ്ഠമായി അന്വേഷണം നടത്തണമെന്നും തീരുമാനം. പ്രാഥമിക അന്വേഷണമായിരിക്കും ആദ്യം നടത്തുന്നത്. പി വി അന്‍വറിന്റെ മൊഴിയും ഉടന്‍ രേഖപ്പെടുത്തും. ഇന്ന് ചേര്‍ന്ന അന്വേഷണ സംഘത്തിന്റെ യോഗത്തിലാണ് തീരുമാനം
എഡിജിപി എം ആര്‍ അജിത് കുമാര്‍ ഉള്‍പ്പടെയുള്ള പൊലീസുകാര്‍ക്കും മുഖ്യമന്ത്രിയുടെ പൊളിറ്റിക്കല്‍ സെക്രട്ടറി പി ശശിക്കുമെതിരെ ശക്തമായ ആരോപണങ്ങളുമായാണ് പി വി അന്‍വര്‍ രംഗത്തെത്തിയത്. മുഖ്യമന്ത്രി പിണറായി വിജയനേയും സിപിഐഎം സംസ്ഥാന സെക്രട്ടറി എം വി ഗോവിന്ദനെയും നേരിട്ട് കണ്ട് പി വി അന്‍വര്‍ പരാതി നല്‍കിയിരുന്നു. ലക്ഷക്കണക്കിന് സഖാക്കള്‍ പറയാന്‍ ആഗ്രഹിച്ചതാണ് താന്‍ പറഞ്ഞതെന്നും ജനങ്ങളുടെ വികാരമാണെന്നുമായിരുന്നു അന്‍വറിന്റെ പ്രതികരണം.
എം വി ഗോവിന്ദനുമായി കൂടിക്കാഴ്ചയ്ക്ക് ശേഷമാണ് ശക്തമായ ആരോപണങ്ങളുമായി പി വി അന്‍വര്‍ വീണ്ടും രംഗത്തെത്തിയത്. തന്റെ നീക്കങ്ങള്‍ സര്‍ക്കാരിനെ തകര്‍ക്കാന്‍ ശ്രമിക്കുന്നവര്‍ക്കെതിരായ വിപ്ലവമെന്നാണ് അന്‍വര്‍ വിശേഷിപ്പിച്ചത്.