നാനൂറിലധികം ജീവനക്കാർക്ക് പിരിച്ചുവിടൽ നോട്ടീസ് നൽകി വ്യോമയാന വ്യവസായ കമ്പനിയായ ബോയിങ്ങ്. സാമ്പത്തിക പ്രതിസന്ധികളിൽ നിന്ന് കമ്പനി കരകയറുന്നതിനുള്ള നടപടികളുടെ ഭാഗമാണ് ഈ പിരിച്ചുവിടൽ. കമ്പനിയുടെ മെഷീനിസ്റ്റ് യൂണിയൻ എട്ട് ആഴ്ചത്തേക്ക് പണിമുടക്കും.

സൊസൈറ്റി ഓഫ് പ്രൊഫഷണൽ എഞ്ചിനീയറിംഗ് എംപ്ലോയീസ് ഇൻ എയറോസ്‌പേസിലെ അംഗങ്ങൾ കൂടിയായ ഈ ജീവനക്കാരുടെ പുറത്താക്കൽ സംബന്ധിച്ച നോട്ടീസ് കഴിഞ്ഞയാഴ്ചയാണ് പുറത്ത് വിടുന്നത്.  തൊഴിലാളികൾ ജനുവരി പകുതി വരെ ശമ്പളപ്പട്ടികയിൽ തുടരും.

ഒക്ടോബറിൽ ബോയിംങ് തങ്ങളുടെ തൊഴിലാളികളുടെ 10 ശതമാനം, ഏകദേശം 17,000 ജോലികൾ, വരും മാസങ്ങളിൽ വെട്ടിക്കുറയ്ക്കാൻ പദ്ധതിയിടുന്നതായി പ്രഖ്യാപിച്ചിരുന്നു. സാമ്പത്തിക യാഥാർത്ഥ്യവുമായി പൊരുത്തപ്പെടുന്നതിന് കമ്പനിയിലെ തൊഴിലാളികളുടെ നിലവാരം പുനഃസജ്ജമാക്കാനാണ്  ഈ നടപടിയെന്ന് സിഇഒ കെല്ലി ഓർട്ട്ബെർഗ് ജീവനക്കാരോട് പറഞ്ഞു.

438 അംഗങ്ങളെ വെട്ടിക്കുറച്ചതായി സൊസൈറ്റി ഓഫ് പ്രൊഫഷണൽ എഞ്ചിനീയറിംഗ് എംപ്ലോയീസ് ഇൻ എയ്‌റോസ്‌പേസ് യൂണിയൻ പറഞ്ഞു. യൂണിയൻ്റെ ലോക്കൽ ചാപ്റ്ററിൽ 17,000 ബോയിംങ് ജീവനക്കാരാണുള്ളത്, വാഷിംഗ്ടൺ, ഒറിഗോൺ, കാലിഫോർണിയ, യൂട്ട എന്നിവിടങ്ങളിൽ നിന്നുള്ളവരാണ് അവരിലേറെയും.

ആ 438 തൊഴിലാളികളിൽ 218 പേർ എഞ്ചിനീയർമാരും ശാസ്ത്രജ്ഞരും ഉൾപ്പെടുന്ന എസ്പിഇഇഎയുടെ പ്രൊഫഷണൽ യൂണിറ്റിലെ അംഗങ്ങളാണ്. അനലിസ്റ്റുകൾ, പ്ലാനർമാർ, സാങ്കേതിക വിദഗ്ധർ, വിദഗ്ധരായ വ്യാപാരികൾ എന്നിവരടങ്ങുന്ന സാങ്കേതിക യൂണിറ്റിലെ അംഗങ്ങളാണ് ബാക്കിയുള്ളവർ.

യോഗ്യരായ ജീവനക്കാർക്ക് മൂന്ന് മാസം വരെ കരിയർ ട്രാൻസിഷൻ സേവനങ്ങളും സബ്‌സിഡിയുള്ള ആരോഗ്യ പരിരക്ഷാ ആനുകൂല്യങ്ങളും ലഭിക്കും. എല്ലാ വർഷവും ഏകദേശം ഒരാഴ്ചത്തെ ശമ്പളവും ജീവനക്കാർക്ക് ലഭ്യമാക്കും.സാമ്പത്തിക പ്രതിസന്ധിയല്ല കാരണമെന്നും ജീവനക്കാരുടെ എണ്ണത്തിൽ വന്ന വർദ്ധനവാണ് ഇത്തരമൊരു നടപടിയിലേക്ക് സ്ഥാപനത്തെ നയിച്ചതെന്ന് ഒക്ടോബറിൽ കെല്ലി ഓർട്ട്ബെർഗ് പറഞ്ഞിരുന്നു. 

ജനുവരിയിൽ അലാസ്ക എയർലൈൻസ് വിമാനത്തിൻ്റെ ഫ്യൂസ്ലേജ് പാനൽ പൊട്ടിത്തെറിച്ചതിനെത്തുടർന്ന് സാമ്പത്തികവും നിയന്ത്രണപരവുമായ പ്രതിസന്ധിയിലായിരുന്നു സ്ഥാപനം. ഉൽപ്പാദന നിരക്കിൽ ഇടിവുണ്ടാവുകയും ഫെഡറൽ ഏവിയേഷൻ അഡ്മിനിസ്‌ട്രേഷൻ 737ൽ നിന്ന് പ്രതിമാസം 38 വിമാനങ്ങൾ എന്ന തോതിൽ ഉൽപ്പാദനം നിയന്ത്രിക്കുകയും ചെയ്തിരുന്നു.