ഓപ്പറേഷൻ സിന്ദൂറിന്റെ ഭാഗമായി ഇന്ത്യ റാവൽപിണ്ടിയിലെയും പഞ്ചാബ് പ്രവിശ്യയിലെയും രണ്ട് വ്യോമതാവളങ്ങൾ ആക്രമിച്ചതിനെത്തുടർന്ന് ഇന്ത്യയുമായി വെടിനിർത്തലിന് അഭ്യർത്ഥിക്കാൻ പാകിസ്താൻ നിർബന്ധിതരായി എന്ന് പാകിസ്താൻ ഉപപ്രധാനമന്ത്രി ഇഷാഖ് ദാർ പറഞ്ഞു. ഒരു ടിവി വാർത്താ പരിപാടിയിൽ പങ്കെടുക്കവെ, റാവൽപിണ്ടിയിലെ നൂർ ഖാൻ വ്യോമതാവളവും, പഞ്ചാബ് പ്രവിശ്യയിലെ പിഎഎഫ് ബേസ് റഫീഖി എന്നറിയപ്പെടുന്ന ഷോർകോട്ട് വ്യോമതാവളവും ഇന്ത്യ ആക്രമിച്ചതായി ദാർ പറഞ്ഞു. ഈ ഘട്ടത്തിൽ പാകിസ്താൻ, അമേരിക്കയുടെ ഇടപെടലിനായി സമീപിക്കുകയും, സൗദി അറേബ്യയുടെ സഹായം സ്വീകരിക്കുകയും ചെയ്തു.

പാകിസ്താനിലെ ഏറ്റവും പ്രമുഖമായ സൈനിക കോമ്പൗണ്ടുകളിൽ ഒന്നാണ് നൂർ ഖാൻ വ്യോമതാവളം. വ്യോമസേനാ പ്രവർത്തനങ്ങളും വിഐപി ഗതാഗത യൂണിറ്റുകളും ഇവിടെയുണ്ട്.

"നിർഭാഗ്യവശാൽ, പുലർച്ചെ 2.30 ന് ഇന്ത്യ വീണ്ടും മിസൈൽ ആക്രമണം നടത്തി. അവർ നൂർ ഖാൻ വ്യോമതാവളവും ഷോർകോട്ട് വ്യോമതാവളവും ആക്രമിച്ചു. 45 മിനിറ്റിനുള്ളിൽ, സൗദി രാജകുമാരൻ ഫൈസൽ എന്നെ വിളിച്ചു. (യുഎസ് സ്റ്റേറ്റ് സെക്രട്ടറി) മാർക്കോ റൂബിയോയുമായുള്ള എന്റെ സംഭാഷണത്തെക്കുറിച്ച് താൻ അറിഞ്ഞതായി അദ്ദേഹം പറഞ്ഞു. (ഇന്ത്യയുടെ വിദേശകാര്യ മന്ത്രി) എസ് ജയ്ശങ്കറുമായി സംസാരിക്കാനും അവർ (ഇന്ത്യ) നിർത്തിയാൽ ഞങ്ങൾ തയ്യാറാണെന്ന് അറിയിക്കാനും അദ്ദേഹത്തിന് അധികാരമുണ്ടോ എന്ന് അദ്ദേഹം ചോദിച്ചു. അതെ, സഹോദരാ, നിങ്ങൾക്ക് കഴിയും എന്ന് ഞാൻ പറഞ്ഞു. തുടർന്ന് അദ്ദേഹം എന്നെ തിരികെ വിളിച്ചു, ജയ്ശങ്കറിനോട് ഇക്കാര്യം അറിയിച്ചതായി പറഞ്ഞു," ദാർ പറഞ്ഞു.

പാകിസ്താന്റെ രണ്ട് സുപ്രധാന കേന്ദ്രങ്ങളായ റാവൽപിണ്ടിക്കും ഇസ്ലാമാബാദിനും ഇടയിൽ സ്ഥിതി ചെയ്യുന്ന തന്ത്രപ്രധാനമായ വ്യോമതാവളമാണ് നൂർ ഖാൻ. ആദ്യത്തേത് പാകിസ്താൻ സൈന്യത്തിന്റെ ആസ്ഥാനവും, രണ്ടാമത്തേത് രാജ്യത്തിന്റെ രാഷ്ട്രീയ അധികാര കേന്ദ്രവുമാണ്.

ഏപ്രിൽ 22-ന് ജമ്മു-കശ്മീരിലെ പഹൽഗാമിൽ 26 വിനോദസഞ്ചാരികളുടെ മരണത്തിനിടയാക്കിയ ആക്രമണത്തിന് മറുപടിയായി, മെയ് 7, 8 തീയതികളിലെ രാത്രിയിൽ ഇന്ത്യ ഓപ്പറേഷൻ സിന്ദൂർ ആരംഭിക്കുകയും, പാകിസ്താനിലെയും, പാകിസ്താൻ അധിനിവേശ കശ്മീരിലെയും (പിഒകെ) ഒമ്പത് ഭീകര കേന്ദ്രങ്ങളിലെ അടിസ്ഥാന സൗകര്യങ്ങൾ നശിപ്പിക്കുകയും ചെയ്തു.

എന്നിരുന്നാലും, ഈ ഓപ്പറേഷൻ ഉഭയകക്ഷി സംഘർഷങ്ങൾ വർദ്ധിപ്പിച്ചു, അത് ഇരു രാജ്യങ്ങളും തമ്മിലുള്ള ആക്രമണങ്ങൾക്കും പ്രത്യാക്രമണങ്ങൾക്കും കാരണമായി. പാകിസ്താൻ നടപടികൾക്ക് ഇന്ത്യ ശക്തമായി തിരിച്ചടിച്ചു.

ഇന്ത്യൻ സർക്കാർ വൃത്തങ്ങൾ പറയുന്നതനുസരിച്ച്, സംഘർഷം വർദ്ധിക്കുമെന്ന പ്രതീക്ഷയിൽ അമേരിക്കൻ ഉദ്യോഗസ്ഥർ ഇരുപക്ഷവുമായും ബന്ധപ്പെട്ടിരുന്നു. പരസ്യമായി നിഷ്പക്ഷ നിലപാട് പുലർത്തിയെങ്കിലും, ഇസ്ലാമാബാദിന് ഒരു ഉറച്ച സന്ദേശം നൽകിയതായി റിപ്പോർട്ടുണ്ട്: ഔദ്യോഗിക സൈനിക ഹോട്ട്‌ലൈൻ ഉപയോഗിക്കുകയും, കൂടുതൽ കാലതാമസമില്ലാതെ സംഘർഷം കുറയ്ക്കുകയും ചെയ്യുക. ഇന്ത്യൻ സൈന്യവുമായി നേരിട്ടുള്ള ഹോട്ട്ലൈൻ സജീവമാക്കാനും, കാലതാമസം ഒഴിവാക്കാനും അമേരിക്ക പാകിസ്താനോട് "ഉത്തരവിടുകയായിരുന്നു".

മെയ് 10 ന് ഉച്ചകഴിഞ്ഞ്, പാകിസ്താന്റെ കൂടുതൽ ആക്രമണാത്മക നിലപാടുകൾ ഇന്ത്യ നിർവീര്യമാക്കിയ ശേഷം, പാകിസ്താന്റെ ഡിജിഎംഒ മേജർ ജനറൽ കാഷിഫ് അബ്ദുള്ള തന്റെ ഇന്ത്യൻ ഡിജിഎം ലെഫ്റ്റനന്റ് ജനറൽ രാജീവ് ഗായിയെ നേരിട്ട് വിളിച്ചു.  അന്നേ ദിവസം വൈകുന്നേരം 5 മണി മുതൽ പ്രാബല്യത്തിൽ വരുന്നതരത്തിൽ കര, വ്യോമ, കടൽ വഴിയുള്ള എല്ലാ വെടിവയ്പ്പുകളും, സൈനിക നടപടികളും നിർത്താൻ ഇരുപക്ഷവും ഒരു കരാറിലെത്തി.