ഗാസയിൽ ബോംബാക്രമണം നിർത്താൻ ഇസ്രായേലിനോട് അമേരിക്കൻ പ്രസിഡന്റ് ഡൊണാൾഡ് ട്രംപ്. ഹമാസ് സമാധാനത്തിന് തയ്യാറാണെന്നും അദ്ദേഹം പറഞ്ഞു. യുദ്ധം അവസാനിപ്പിക്കാനുള്ള അമേരിക്കൻ പദ്ധതിയുടെ ഭാഗമായി ബന്ദികളെ മോചിപ്പിക്കാനും മറ്റ് ചില വ്യവസ്ഥകൾ അംഗീകരിക്കാനും ഹമാസ് സമ്മതിച്ചതിനെത്തുടർന്നാണ് ഗാസയിൽ ബോംബാക്രമണം ഉടൻ നിർത്താൻ ട്രംപ് ഇസ്രായേലിനോട് ആവശ്യപ്പെട്ടത്. ഹമാസിന്റെ പ്രതികരണത്തെത്തുടർന്ന് ബന്ദികളെ മോചിപ്പിക്കാനുള്ള ഗാസ പദ്ധതിയുടെ ആദ്യ ഘട്ടം "ഉടനടി നടപ്പിലാക്കാൻ" ഇസ്രായേൽ തയ്യാറെടുക്കുകയാണെന്ന് പ്രധാനമന്ത്രി ബെഞ്ചമിൻ നെതന്യാഹുവിന്റെ ഓഫീസ് പറഞ്ഞു.

താമസിയാതെ, ഗാസയിലെ ആക്രമണ പ്രവർത്തനങ്ങൾ കുറയ്ക്കാൻ ഇസ്രായേലിലെ രാഷ്ട്രീയ നേതൃത്വം സൈന്യത്തിന് നിർദ്ദേശം നൽകിയതായി ഇസ്രായേലി മാധ്യമങ്ങൾ റിപ്പോർട്ട് ചെയ്തു.

എന്നാൽ, ഗാസയിൽ സൈനിക പ്രവർത്തനങ്ങൾ കുറയ്ക്കുമോ എന്ന് വ്യക്തമായി പരാമർശിക്കാതെ, ട്രംപിന്റെ പദ്ധതിയുടെ ആദ്യ ഘട്ടം നടപ്പിലാക്കുന്നതിനുള്ള തയ്യാറെടുപ്പ് വർദ്ധിപ്പിക്കാൻ ഇസ്രായേലി സൈനിക മേധാവി ഒരു പ്രസ്താവനയിൽ സേനകൾക്ക് നിർദ്ദേശം നൽകി.

ഗാസയുടെ ഭരണനിർവഹണം നടത്തുന്ന ഹമാസ്, ട്രംപിന്റെ 20-ഇന പദ്ധതിയോട് പ്രതികരിച്ചു. പദ്ധതി, സ്വീകരിക്കാനോ, തള്ളിക്കളഞ്ഞു ഗുരുതരമായ പ്രത്യാഘാതങ്ങൾ നേരിടാനോ ഞായറാഴ്ച വരെ സമയം ട്രംപ് നൽകിയതിനെ തുടർന്നാണ് ഹമാസിന്റെ പ്രതികരണം.

ഗാസയിൽ സമാധാനം കൈവരിക്കാൻ കഴിവുള്ള ഒരേയൊരു വ്യക്തിയായി സ്വയം വിശേഷിപ്പിക്കുന്ന വ്യക്തിയാണ്  ട്രംപ്. പതിനായിരക്കണക്കിന് ആളുകളെ കൊന്നൊടുക്കുകയും അമേരിക്കൻ  സഖ്യകക്ഷിയായ ഇസ്രായേൽ ലോകമാകെ കൂടുതൽ ഒറ്റപ്പെടുകയും ചെയ്ത രണ്ട് വർഷം പഴക്കമുള്ള യുദ്ധം അവസാനിപ്പിക്കാനുള്ള ശ്രമങ്ങളിൽ അദ്ദേഹം ഗണ്യമായ നിലയിൽ രാഷ്ട്രീയ മൂലധനം നിക്ഷേപിച്ച അവസ്ഥയിലാണ്.

ഹമാസ് സമാധാനത്തിന് തയ്യാർ

"ശാശ്വത സമാധാനത്തിന് തയ്യാറാണ്" എന്ന് ഹമാസ് തെളിയിച്ചിട്ടുണ്ടെന്ന് താൻ വിശ്വസിക്കുന്നുവെന്ന് ട്രംപ് പറഞ്ഞു.  "ബന്ദികളെ സുരക്ഷിതമായും വേഗത്തിലും മോചിപ്പിക്കാൻ ഇസ്രായേൽ ഗാസയിലെ ബോംബിംഗ് ഉടൻ നിർത്തണം!" ട്രംപ് തന്റെ ട്രൂത്ത് സോഷ്യൽ പ്ലാറ്റ്‌ഫോമിൽ എഴുതി. "തീരുമാനിക്കേണ്ട വിശദാംശങ്ങളെക്കുറിച്ച് ഞങ്ങൾ ഇതിനകം ചർച്ചകൾ നടത്തിവരികയാണ്. ഇത് ഗാസയെക്കുറിച്ചല്ല, ഇത് മിഡിൽ ഈസ്റ്റിൽ വളരെക്കാലമായി ആഗ്രഹിക്കുന്ന സമാധാനത്തെക്കുറിച്ചാണ്."

"പ്രസിഡന്റ് ട്രംപിന്റെ ദർശനവുമായി പൊരുത്തപ്പെടുന്ന ഇസ്രായേൽ മുന്നോട്ടുവച്ച തത്വങ്ങൾക്ക് അനുസൃതമായി യുദ്ധം അവസാനിപ്പിക്കാൻ പ്രസിഡന്റുമായും സംഘവുമായും പൂർണ്ണ സഹകരണത്തോടെ ഇസ്രായേൽ പ്രവർത്തിക്കുന്നത് തുടരുമെന്ന് നെതന്യാഹുവിന്റെ ഓഫീസ് പറഞ്ഞു."

ട്രംപിന്റെ നിർദേശം പുറത്തുവന്നതിന് ശേഷവും ഗാസ നഗരത്തിന്റെ ഹൃദയഭാഗത്തുള്ള ഒരു പ്രധാന ധമനിയായ തലതീനി സ്ട്രീറ്റിൽ ഇസ്രായേൽ ടാങ്കുകൾ ബോംബെറിഞ്ഞതായി താമസക്കാർ പറഞ്ഞു.

ഹമാസ് പ്രസ്താവന പുറപ്പെടുവിച്ചതിന് മണിക്കൂറിനുള്ളിൽ ഗാസ നഗരത്തിൽ ഇസ്രായേൽ സൈനിക വിമാനങ്ങൾ ബോംബാക്രമണം ശക്തമാക്കിയതായും റെമാലിലെ നിരവധി വീടുകൾ തകർത്തതായും ദൃക്‌സാക്ഷികൾ പറഞ്ഞു. എന്നാൽ കഴിഞ്ഞ ദിവസങ്ങളുമായി താരതമ്യം ചെയ്യുമ്പോൾ ആക്രമണങ്ങളുടെ തീവ്രത കുറവാണെന്ന് അൽ ജസീറ റിപ്പോർട്ട് ചെയ്യുന്നു.