ഇസ്രയേല്‍ റഫയില്‍ നടത്തിയ ആക്രമണത്തില്‍ 22 പലസ്തീനികള്‍ കൊല്ലപ്പെട്ടു. കരേം അബു സലേം ക്രോസിംഗില്‍ ഇസ്രയേലിനെതിരെ റോക്കറ്റ് ആക്രമണം നടത്തിയതായി ഹമാസ് അവകാശപ്പെട്ടതിന് പിന്നാലെയാണ് ആക്രമണം. ഹമാസ് ആക്രമണത്തില്‍ മൂന്ന് ഇസ്രയേല്‍ സൈനികര്‍ കൊല്ലപ്പെട്ടിരുന്നു. ഹമാസ് ആക്രമണത്തിന് തൊട്ടുപിന്നാലെ റഫയിലെ ഒരു വീടിന് നേരെ ഇസ്രയേല്‍ നടത്തിയ വ്യോമാക്രമണത്തില്‍ മൂന്ന് പേര്‍ കൊല്ലപ്പെടുകയും നിരവധി പേര്‍ക്ക് പരുക്കേല്‍ക്കുകയും ചെയ്തിരുന്നു. 

ഗാസയിലെ വെടിനിര്‍ത്തലിനായി ഈജിപ്തിലെ കെയ്‌റോയില്‍ നടന്ന ഏറ്റവും പുതിയ ചര്‍ച്ചകള്‍ അവസാനിച്ചു. അതേസമയം ഖത്തര്‍ ആസ്ഥാനമായി പ്രവര്‍ത്തിക്കുന്ന വാര്‍ത്താ ചാനലായ അല്‍ ജസീറയുടെ പ്രവര്‍ത്തനം രാജ്യത്ത് അവസാനിപ്പിക്കാന്‍ ഇസ്രയേല്‍ മന്ത്രിസഭ തീരുമാനിച്ചതായി ബെഞ്ചമിന്‍ നെതന്യാഹു അറിയിച്ചു. ഇതുമായി ബന്ധപ്പെട്ട ഉത്തരവുകള്‍ ഉടന്‍ പ്രാബല്യത്തില്‍ വരുമെന്നും ഇസ്രയേല്‍ വ്യക്തമാക്കി. ഒക്ടോബര്‍ 7 മുതല്‍ ഗാസയ്‌ക്കെതിരായ ഇസ്രയേല്‍ ആക്രമണത്തില്‍ 34,683 പലസ്തീനികള്‍ കൊല്ലപ്പെടുകയും 78,018 പേര്‍ക്ക് പരുക്കേറ്റതായുമാണ് റിപ്പോര്‍ട്ട്.

വിലക്കിനെ അപലപിച്ച് അല്‍ജസീറ

അല്‍ജസീറ മാധ്യമ സ്ഥാപനത്തിന്റെ പ്രവര്‍ത്തനങ്ങള്‍ അവസാനിപ്പിക്കാനുള്ള ഇസ്രയേല്‍ ഗവണ്‍മെന്റിന്റെ തീരുമാനത്തെ ക്രിമിനല്‍ നടപടിയെന്ന് വിശേഷിപ്പിച്ചുകൊണ്ട് സ്ഥാപനം അപലപിച്ചു. സ്വതന്ത്ര മാധ്യമങ്ങളെ അടിച്ചമര്‍ത്തുന്നത് അന്താരാഷ്ട്ര മാനുഷിക നിയമങ്ങള്‍ക്ക് വിരുദ്ധമാണെന്നും അല്‍ജസീറ ചൂണ്ടിക്കാട്ടി. ആഗോളതലത്തില്‍ പ്രേക്ഷകര്‍ക്ക് വാര്‍ത്തകളും വിവരങ്ങളും തുടര്‍ന്നും നല്‍കാനുള്ള അവകാശം തങ്ങള്‍ക്കുണ്ടെന്നും വാര്‍ത്താ ഏജന്‍സി വ്യക്തമാക്കി.