കേരളത്തിൽ തദ്ദേശ തിരഞ്ഞെടുപ്പ് നടക്കുന്നതിനാൽ വോട്ടർപ്പട്ടിക തീവ്ര പുനപരിശോധന (എസ്ഐആർ) നടപടികൾ നീട്ടി വയ്ക്കണമെന്ന് ആവശ്യപ്പെട്ട് സംസ്ഥാന സർക്കാർ സുപ്രീം കോടതിയിൽ ഹർജ്ജി നൽകി. ചീഫ് സെക്രട്ടറി  ഡോ. ജയതിലകാണ് സംസ്ഥാന സർക്കാരിന് വേണ്ടി കോടതിയെ സമീപിച്ചത്.

നവംബർ 4 മുതൽ ഡിസംബർ 4 വരെ  എസ്‌ഐആർ പ്രക്രിയ നടത്തുന്നത് കേരളത്തിലെ തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിനൊപ്പം ആയിരിക്കുമെന്ന് സംസ്ഥാനം പറഞ്ഞു. രണ്ട് പ്രക്രിയകളും ഒരേസമയം നടത്തുന്നത് മനുഷ്യവിഭവശേഷിയെ ദുർബലപ്പെടുത്തുക മാത്രമല്ല, സർക്കാരിന്റെ ദൈനംദിന പ്രവർത്തനങ്ങൾ ശ്രദ്ധിക്കാൻ സാധിക്കാതെ വരുമെന്നും, ഭരണസ്‌തംഭനമുണ്ടാക്കുമെന്നും ചൂണ്ടിക്കാട്ടിയാണ് സർക്കാരിന്റെ ഹർജ്ജി.