കോളേജ് മാഗസിനിൽ പലസ്തീൻ അനുകൂല ലേഖനം എഴുതിയതിന്റെ പേരിൽ ഇന്ത്യൻ വംശജനായ പിഎച്ച്ഡി വിദ്യാർത്ഥിയെ അമേരിക്കയിലെ പ്രശസ്ത സ്ഥാപനമായ മസാച്യുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജി (എംഐടി) കഴിഞ്ഞ മാസം സസ്പെൻഡ് ചെയ്തു. പ്രഹ്ലാദ് അയ്യങ്കാറിനെ 2026 ജനുവരി വരെ സസ്പെൻഡ് ചെയ്യുന്നതാണ്. ഇതോടെ അദ്ദേഹത്തിന്റെ അഞ്ച് വർഷത്തെ നാഷണൽ സയൻസ് ഫൗണ്ടേഷൻ ഗ്രാജുവേറ്റ് റിസർച്ച് ഫെലോഷിപ്പ് അവസാനിക്കും.

റിട്ടൺ റെവല്യൂഷൻ എന്ന കോളേജ് മാഗസീനിലാണ് പലസ്തീൻ അനുകൂല ലേഖനം അയ്യങ്കാർ എഴുതിയത്. അദ്ദേഹം അതിൽ ഉപയോഗിച്ച ഭാഷയും പദപ്രയോഗങ്ങളും കാമ്പസിൽ അക്രമാസക്തമായ പ്രതിഷേധത്തിന് ആഹ്വാനം ചെയ്തുവെന്ന പേരിലാണ് എംഐടി നടപടി എടുത്തിട്ടുള്ളതെന്ന് ഇന്ത്യ ടുഡേ റിപ്പോർട്ട് ചെയ്തു. മാസികയും നിരോധിച്ചിട്ടുണ്ട്. അമേരിക്കയിലുടനീളമുള്ള കാമ്പസുകളിൽ അഭിപ്രായ സ്വാതന്ത്ര്യത്തിന്റെ പ്രശ്നം ഉയർത്തിക്കാട്ടുന്നതാണ് സസ്പെൻഷനെന്ന് അയ്യങ്കാർ പ്രതികരിച്ചു.

ഇലക്ട്രിക്കൽ എൻജിനീയറിങ് ആൻഡ് കംപ്യൂട്ടർ സയൻസ് വിഭാഗത്തിൽ പിഎച്ച്ഡി ഗവേഷകനാണ്  
അയ്യങ്കാർ. പലസ്തീന് അനുകൂല പ്രതിഷേധത്തെ തുടർന്ന് കഴിഞ്ഞ വർഷവും അദ്ദേഹത്തെ സസ്പെൻഡ് ചെയ്തിരുന്നു. അയ്യങ്കറിന്റെ ഏറ്റവും പുതിയ സസ്പെൻഷനെത്തുടർന്ന് വർണ്ണവിവേചനത്തിനെതിരായ എംഐടി സഖ്യം പ്രതിഷേധം ആരംഭിച്ചു. "പലസ്തീൻ അനുകൂല പ്രസ്ഥാനത്തെക്കുറിച്ചുള്ള ലേഖനം കാരണം പ്രഹ്ലാദിന്റെ കാമ്പസ് നിരോധനത്തിനെതിരെ പൊതുജനങ്ങളുടെ പ്രതിഷേധത്തെത്തുടർന്ന്  അനൗപചാരികമായ മുന്നറിയിപ്പായി പരിഹരിക്കപ്പെട്ടിരുന്നു. സമാനമായ ആരോപണങ്ങളിൽ പ്രഹ്ലാദിനെ സസ്പെൻഡ് ചെയ്യുകയായിരുന്നു.

എംഐടി സ്റ്റുഡന്റ് ലൈഫ് ഡീൻ ഡേവിഡ് വാറൻ റാൻഡാൽ മാഗസിൻ എഡിറ്റർമാർക്ക് അയച്ച ഇമെയിൽ അനുസരിച്ച് അയ്യങ്കറുടെ 'ഓൺ പാസിഫിസം' എന്ന ലേഖനം "എംഐടിയിൽ കൂടുതൽ അക്രമാസക്തമോ, വിനാശകരമോ ആയ പ്രതിഷേധത്തിനുള്ള ആഹ്വാനമായി വ്യാഖ്യാനിക്കാൻ കഴിയുന്ന ഭാഷയുണ്ട്" എന്ന് പറയുന്നു. തീവ്രവാദ സംഘടനയായ പോപ്പുലർ ഫ്രണ്ട് ഫോർ ദി ലിബറേഷന് ഓഫ് പലസ്തീന്റെ ലോഗോയുള്ള ചിത്രങ്ങളാണ് ലേഖനത്തിലുള്ളതെന്ന് യുഎസ് സ്റ്റേറ്റ് ഡിപ്പാർട്ട്മെന്റ് അറിയിച്ചു.

സമാധാന തന്ത്രങ്ങൾ പലസ്തീനെ സംബന്ധിച്ചിടത്തോളം മികച്ച മാർഗമായിരിക്കില്ലെന്ന് അയ്യങ്കാർ തന്റെ ലേഖനത്തിൽ എഴുതി. പക്ഷെ പ്രത്യക്ഷത്തിലുള്ള  അക്രമാസക്തമായ ചെറുത്തുനിൽപ്പിന് അദ്ദേഹം നേരിട്ട് ആഹ്വാനം ചെയ്തില്ല.

ഫോട്ടോകൾ നൽകിയത് താനല്ലെന്ന് അയ്യങ്കർ പറയുന്നു. "ഈ അസാധാരണമായ നടപടികൾ ക്യാമ്പസിലെ എല്ലാവരേയും ആശങ്കപ്പെടുത്തണം," അദ്ദേഹം കൂട്ടിച്ചേർത്തു. "ഈ ലേഖനത്തിന്റെ ഫലമായി എന്നെ പുറത്താക്കുകയും റിട്ടൺ റെവല്യൂഷനെ കാമ്പസിൽ നിരോധിക്കുകയും ചെയ്യുന്നത് മുഴുവൻ വിദ്യാർത്ഥി സംഘടനയുടെയും, ഫാക്കൽറ്റിയുടെയും അവകാശങ്ങൾക്ക് നേരെയുള്ള അഭൂതപൂർവമായ ആക്രമണമാണ്. എംഐടിയുടെ മാതൃക കീഴ്വഴക്കമാകും", അദ്ദേഹം പറഞ്ഞു.

"അന്യായമായ നടപടിക്കെതിരെ പ്രഹ്ലാദ് ഇപ്പോൾ ചാൻസിലർക്ക് അപ്പീൽ നൽകുകയാണ്. ശരിയുടെ ഭാഗത്തു നിൽക്കുന്ന വിദ്യാർത്ഥികളെ ക്രിമിനൽവൽക്കരിക്കുന്നത് അവസാനിപ്പിക്കാൻ എംഐടിയുടെ ഭരണകൂടത്തിൽ സമ്മർദ്ദം ചെലുത്താൻ ഞങ്ങൾ പ്രചാരണം ആരംഭിച്ചു. എംഐടിയുടെ അടിച്ചമർത്തലിനെതിരെ നിലകൊള്ളാൻ എല്ലാ സംഘടനകളോടും, മനഃസാക്ഷിയുള്ള സ്ഥാപനങ്ങളോടും ഞങ്ങൾ അഭ്യർത്ഥിക്കുന്നു," വർണ്ണവിവേചനത്തിനെതിരായ എംഐടി സഖ്യം പ്രസ്താവനയിൽ പറഞ്ഞു. ഡിസംബർ 9 ന് കേംബ്രിഡ്ജ് സിറ്റി ഹില്ലിൽ അയ്യങ്കാറിനെ പിന്തുണച്ച് സഖ്യസേന റാലിയും നടത്തി.