ഫ്ലിപ്കാർട്ടിന്റെ എറണാകുളം ജില്ലയിലെ വിവിധ ഡെലിവറി ഹബ്ബുകളിൽ നിന്നും 1.62 കോടി രൂപ വില മതിക്കുന്ന മൊബൈൽ ഫോണുകൾ മോഷണം പോയതായി പരാതി. ജില്ലയിലെ കാഞ്ഞൂര്‍, കുറുപ്പംപടി, മേക്കാട്, മൂവാറ്റുപുഴ ഹബ്ബുകളിലാണ് മോഷണം നടന്നിട്ടുള്ളത്. ഏതാണ്ട് 332 ഫോണുകൾ മോഷണം പോയതായാണ് പരാതി.

ഫ്ലിപ്കാർട്ടിന്റെ എൻഫോഴ്‌സ്‌മെന്റ് ഓഫീസർ നൽകിയ പരാതിയിൽ എറണാകുളം റൂറല്‍ സൈബര്‍ പോലീസ് കേസെടുത്ത് അന്വേഷണം ആരംഭിച്ചതായി എന്‍ഡിടിവി റിപ്പോര്‍ട്ട് ചെയ്തു.

കാഞ്ഞൂർ, കുറുപ്പംപടി, മേക്കാട്, മൂവാറ്റുപുഴ ഹബ്ബുകളുടെ ചുമതലയുണ്ടായിരുന്ന സിദ്ദിഖി കെ അലിയാർ, ജാസിം ദിലീപ്, ഹാരിസ് പിഎ, മാഹിൻ നൗഷാദ് എന്നിവർക്കെതിരെയാണ് കേസെടുത്തിരിക്കുന്നത്.എഫ്‌ഐആർ പ്രകാരം, കാഞ്ചൂർ ഹബ്ബിൽ നിന്ന് 18.14 ലക്ഷം രൂപ വിലവരുന്ന 38 ഫോണുകളും, കുറുപ്പംപടി ഹബ്ബിൽ നിന്ന് 40.97 ലക്ഷം രൂപ വിലവരുന്ന 87 ഫോണുകളും, മേക്കാട് ഹബ്ബിൽ നിന്ന് 48.66 ലക്ഷം രൂപ വിലവരുന്ന 101 ഫോണുകളും, മൂവാറ്റുപുഴ ഹബ്ബിൽ നിന്ന് 53.41 ലക്ഷം രൂപ വിലവരുന്ന 106 ഫോണുകളും ഓർഡർ ചെയ്തിട്ടുണ്ട്.

ഈ ഫോണുകളെല്ലാം അതത് ഡെലിവറി സെന്ററുകളിൽ എത്തിയതിന് ശേഷം കാണാതായതായി റിപ്പോർട്ട് ചെയ്യപ്പെട്ടതായി എഫ്‌ഐആറിൽ പറയുന്നു. വഞ്ചന, വ്യാജരേഖ ചമയ്ക്കൽ എന്നീ കുറ്റങ്ങൾക്ക് ഭാരതീയ ന്യായ സംഹിതയിലെ വിവിധ വകുപ്പുകൾ പ്രകാരം കേസ് രജിസ്റ്റർ ചെയ്തിട്ടുണ്ടെന്നും ഇൻഫർമേഷൻ ടെക്നോളജി ആക്ടിലെ പ്രസക്തമായ വ്യവസ്ഥകൾ ചേർത്തിട്ടുണ്ടെന്നും പോലീസ് പറഞ്ഞു.