ഭക്ഷ്യ-പാനീയ ഉത്പാദന കമ്പനികൾ, ദരി​ദ്രരാജ്യങ്ങളിൽ ​ഗുണമേന്മയില്ലാത്ത ഭക്ഷ്യ ഉത്പന്നങ്ങൾ  വിപണനം നടത്തിയെന്ന് റിപ്പോർട്ട് . സമ്പന്ന രാജ്യങ്ങളിൽ വിൽക്കുന്നതിനേക്കാൾ ​ഗുണമേന്മ കുറഞ്ഞ ഉത്പന്നങ്ങളാണ് ദരിദ്ര രാജ്യങ്ങളിൽ ഉത്പാദന കമ്പനികൾ വിൽക്കുന്നതെന്നതാണ് പുതിയ റിപ്പോർട്ട് പറയുന്നത്. നെസ്ലെ, പെപ്സികോ, യൂണിലിവർ എന്നീ കമ്പനികൾ വിൽപ്പന നടത്തുന്ന ഉത്പന്നങ്ങൾക്കാണ്  ആക്സസ് ടു ന്യൂട്രീഷൻ ഇനിഷ്യേറ്റീവ് (ATNI) പ്രസിദ്ധീകരിച്ച ആ​ഗോള സൂചികയിൽ കുറഞ്ഞ റേറ്റിം​ഗ് ലഭിച്ചത്. 2021ന് ശേഷം ആദ്യമായാണ് ഇങ്ങനൊരു വിലയിരുത്തൽ നടത്തുന്നത്.

ഉത്പന്നങ്ങളുടെ ​ഗുണമേന്മ വിലയിരുത്തുന്നതിനായി ഓസ്​ട്രേലിയ, ന്യൂസിലൻഡ് എന്നിവടങ്ങളിൽ വികസിപ്പിച്ചെടുത്ത സ്റ്റാർ റേറ്റിം​ഗ് സിസ്റ്റത്തിന്റെ അടിസ്ഥാനത്തിൽ 30 കമ്പനികളെ ആണ് എറ്റിഎൻഐ വിലയിരുത്തിയത്. ഹെൽത്ത് സ്റ്റാർ റേറ്റിം​ഗ് സിസ്റ്റത്തിൽ ഉത്പന്നങ്ങളെ അവ നൽകുന്ന ആരോ​ഗ്യ ​ഗുണങ്ങളുടെ അടിസ്ഥാനത്തിൽ 5ൽ നിന്നാണ് റേറ്റ് ചെയ്യുന്നത്. 5ൽ 5 സ്കോറും ലഭിക്കുന്ന ഉത്പന്നങ്ങൾ മികച്ചതായും 3.5 ലഭിക്കുന്ന ഉത്പന്നങ്ങൾ ആരോ​ഗ്യകരമായ തിരഞ്ഞെടുപ്പായും കണക്കാക്കുന്നു.

ദരിദ്ര രാജ്യങ്ങളിൽ ബഹുരാഷ്ട്ര കമ്പനികൾ വിൽക്കുന്ന ഉത്പന്നങ്ങൾക്ക് 1.8 ആണ് സ്റ്റാർ റേറ്റിം​ഗ് ലഭിച്ചിരിക്കുന്നത്. സമ്പന്ന രാജ്യങ്ങളിൽ ഉത്പന്നങ്ങളുടെ റേറ്റിം​ഗ് 2.8ന് താഴേക്ക് പോയിട്ടില്ല. കമ്പനികൾ കൂടുതൽ സജീവമായ ദരിദ്ര രാജ്യങ്ങളിൽ വിൽക്കുന്ന ഉത്പന്നങ്ങൾക്ക് ​ഗുണമേന്മയില്ലെന്നാണ് ചിത്രം വ്യക്തമാക്കുന്നതെന്ന് എറ്റിഎൻഐയുടെ റിസർച്ച് ഡയറക്ടർ മാർക്ക് വിജ്നെ പറയുന്നു. ആദ്യമായാണ് ദരിദ്ര-സമ്പന്ന രാജ്യങ്ങളെന്ന അടിസ്ഥാനത്തിൽ സൂചിക ഉപയോ​ഗിച്ച് വിലയിരുത്തൽ നടത്തുന്നത്. കൂടുതൽ പോഷക​ഗുണമുള്ള ഭക്ഷണങ്ങളുടെ വിൽപ്പന വർദ്ധിപ്പിക്കാനും കൂടുതൽ സമീകൃതാഹാരങ്ങളിലേക്ക് ആളുകളെ നയിക്കാനും തങ്ങൾ പ്രതിജ്ഞാബന്ധരാണെന്നാണ് നെസ്ലെയുടെ വക്താവ് ഈ വിഷയത്തിൽ പ്രതികരിച്ചത്. ഭക്ഷ്യപദാർത്ഥങ്ങളിലെ സോഡിയം കുറയ്ക്കാനും ധാന്യങ്ങൾ പോലുള്ള ചേരുവ ഭക്ഷണത്തിൽ കൂടുതലായി ഉൾപ്പെടുത്താനുമുള്ള ശ്രമങ്ങൾ കഴി‍ഞ്ഞ വർഷം മുതൽ സ്വീകരിക്കുന്നുണ്ടെന്ന് പെപ്സികോയുടെ വക്താവ് അവകാശപ്പെട്ടു.