കോൺഗ്രസ് നേതാവ് നവജ്യോത് സിംങ് സിദ്ദു ഇന്ന് ജയിൽ മോചിതനാവും. 34 വർഷം മുൻപ് നടന്ന കൊലപാതകവുമായി ബന്ധപ്പെട്ടാണ് സിദ്ദു പാട്യാല ജയിലിൽ കഴിയുന്നത്. ഇന്ന് ജയിൽ മോചിതനാവും എന്ന വിവരം അദ്ദേഹത്തിന്റെ ട്വിറ്ററിലൂടെയാണ് പുറത്തു വന്നത്. നവജ്യോത് സിദ്ദുവിന്റെ അഭിഭാഷകനും ഈ കാര്യം സ്ഥിരീകരിച്ചു. 1988 ൽ നവജ്യോത് സിദ്ദുവും സുഹൃത്തും ചേർന്ന് 65കാരനായ ഗുർനാം സിങിനെ വധിച്ചു എന്ന കേസിലാണ് കഴിഞ്ഞ വർഷം സുപ്രീം കോടതി ഒരു വർഷത്തേക്ക് തടവിന് വിധിച്ചത്. ജയിലിലെ നല്ലനടപ്പ് പരിഗണിച്ചാണ് 12 മാസത്തെ തടവ് 10 മാസമാക്കി ചുരുക്കിയത്. 2018 ൽ കേസ് പരിഗണിച്ച സുപ്രീം കോടതി 1000 രൂപ പിഴ ഒടുക്കാനായിരുന്നു നിർദ്ദേശിച്ചിരുന്നത്. എന്നാൽ പിന്നീട് സുപ്രീം കോടതി തന്നെ വിധി പുനഃപരിശോധിക്കുകയും ഒരു വർഷത്തെ തടവിന് വിധിക്കുകയുമായിരുന്നു.