സെർവിക്കൽ കാൻസറിന്റെ മരണ സാധ്യത 40 ശതമാനം കുറയ്ക്കാൻ സാധ്യതയുള്ള ചികിത്സരീതി കണ്ടെത്തിയതായി റിപ്പോർട്ട്. 25 വർഷത്തിനിടയിലെ ഏറ്റവും വലിയ നേട്ടമായി ഇതിനെ വിലയിരുത്തുന്നു ആരോ​ഗ്യരം​ഗം.

സ്ത്രീകളിൽ ഏറ്റവും കൂടുതലായി കണ്ടുവരുന്ന കാൻസറുകളിൽ ഒന്നായാണ് ​സെർവിക്കൽ കാൻസറിനെ വിലയിരുത്തുന്നത്. പ്രതിവർഷം 6,60,0000 രോഗബാധയും  3,50,000 മരണങ്ങളും ആ​ഗോളതലത്തിൽ ​സെർവിക്കൽ കാൻസർ മൂലം സംഭവിക്കുന്നതായി ലോകാരോ​ഗ്യ സംഘടന കണക്കാക്കുന്നു. യുകെയിൽ മാത്രമായി പ്രതിവർഷം 3200 കേസുകളും 800 മരണങ്ങളും സംഭവിക്കുന്നുണ്ട്. ഇവരിൽ കൂടുതലും 30കളിലുള്ളവരാണ്, ചികിത്സയിൽ പുരോ​ഗതി ഉണ്ടായിട്ടും 30 ശതമാനം ആളുകളിലും രോ​ഗം തിരികെയെത്തുന്നു. യുകെ, ഇറ്റലി, മെക്സിക്കോ, ഇന്ത്യ, ബ്രസീൽ എന്നിവടങ്ങളിൽ നിന്ന് തിരഞ്ഞെടുത്ത 10 വർഷത്തിലധികമായി രോ​ഗമുള്ളവരിലാണ് പുതിയ ചികിത്സ രീതി ആദ്യം പരീക്ഷിക്കുക. സാധാരണ ചികിത്സയിൽ കീമോതെറാപ്പിയും റേഡിയേഷനും സംയോജിതമായാണ് ഉപയോ​ഗിക്കുക, എന്നാൽ പുതിയ രീതിയിൽ രോ​ഗികളിൽ റേഡിയേഷൻ നടത്തുന്നതിന് മുമ്പായി കുറച്ചു കാലം കിമോ തെറാപ്പി നടത്തുന്നു.

രോ​ഗികളിൽ  രോ​ഗം മൂലമുള്ള മരണസാധ്യത 40 ശതമാനം കുറഞ്ഞതായും അഞ്ച്  വർഷത്തിനുള്ളിൽ രോ​ഗം തിരികെ വരാനുള്ള സാധ്യത 35 ശതമാനം കുറഞ്ഞതായും  മൂന്നാം ഘട്ടത്തിൽ നടപ്പിലാക്കിയ ക്ലിനിക്കൽ ട്രയൽ വ്യക്തമാക്കുന്നതായി പഠനത്തിന് നേതൃത്വം നൽകിയ ലണ്ടനിലെ യൂണിവേഴ്സിറ്റി കോളേജ് പറയുന്നു. 1999ലെ കീമോ റേഡിയേഷന്റെ കണ്ടെത്തലിന് ശേഷമുള്ള മറ്റൊരു നേട്ടമായി ഈ കണ്ടെത്തലിനെ ​ഗവേഷകർ വിലയിരുത്തുന്നു. പരീക്ഷണ ചികിത്സയ്ക്ക് വിധേയമായ രോ​ഗികളെ സംബന്ധിച്ച വിവരങ്ങളെല്ലാം തന്നെ കൃത്യമായി ശേഖരിച്ചിരുന്നു. യുകെയിലെ കാൻസർ റിസർച്ച് യുസിഎൽ കാൻസർ ട്രയൽ സെന്റർ എന്നിവയുടെ ധനസഹായത്തോടെ നടത്തിയ ട്രയൽ രോ​ഗികളിലെ ചികിത്സരീതിയിലെ മാറ്റം ഫലം ചെയ്യുന്നുണ്ടോ എന്ന് വിലയിരുത്തി. 500 സ്ത്രീകളിലാണ് പരീക്ഷണം നടത്തിയത്, ഇവരിലൊന്നും തന്നെ മറ്റ് അവയവങ്ങളിൽ രോ​​ഗത്തിന് കാരണമായ ട്യൂമറുകൾ പടർന്നില്ല. 

കീമോതെറാപ്പിയുടെ ചെറിയ കോഴ്സ് സ്വീകരിച്ചവരിൽ 80 ശതമാനം പേരും ജീവിച്ചിരിക്കുന്നതായും അവരിൽ 72 ശതമാനം ആളുകളിൽ രോ​ഗം മറ്റു അവയവങ്ങളിലേക്ക് ബാധിച്ചിരുന്നില്ലെന്നും പറയുന്നു. സാധാരണ ചികിത്സരീതി ഉപയോ​ഗിച്ചവരിൽ 72 ശതമാനം ആളുകൾ ജീവിച്ചിരിക്കുന്നതായും, 64 ശതമാനം ആളുകളിൽ രോ​ഗം മറ്റു അവയവങ്ങളിലേക്ക് ബാധിച്ചിരുന്നില്ലെന്നും പറയുന്നു. മരണസാധ്യത 40 ശതമാനവും ​രോ​ഗത്തിലെ അപകടസാധ്യത 35 ശതമാനവും കുറഞ്ഞതായും പഠനം പറയുന്നു.