ഓപ്പറേഷന് സിന്ദൂര്: എഴുപത്തഞ്ചോളം വിദ്യാര്ത്ഥികള് കേരള ഹൗസിലെത്തി
ഓപ്പറേഷന് സിന്ദൂറിന്റെ പശ്ചാത്തലത്തില് സംഘര്ഷ ബാധിതമായ അതിര്ത്തി സംസ്ഥാനങ്ങളിലെ യൂണിവേഴ്സിറ്റികളില് നിന്നും കേരളത്തിലേക്ക് മടങ്ങുന്ന വിദ്യാര്ത്ഥികള് ഡല്ഹി കേരള ഹൗസിലെത്തിയെന്ന് മുഖ്യമന്ത്രി പിണറായി വിജയന്റെ ഓഫീസ് അറിയിച്ചു.
ജമ്മുകശ്മീര്, രാജസ്ഥാന്, പഞ്ചാബ് എന്നിവിടങ്ങളിലെ വിവിധ കേന്ദ്ര - സംസ്ഥാന യൂണിവേഴ്സിറ്റികളില് പഠിക്കുന്ന എഴുപത്തഞ്ചോളം വിദ്യാര്ത്ഥികള് ഇന്നലെ രാത്രിയോടെയും ഇന്ന് പുലര്ച്ചയുമായിട്ടാണ് കേരള ഹൗസിലെത്തിയത്.
സംസ്ഥാനത്തിന്റെ വിവിധ ഭാഗങ്ങളില് നിന്നുള്ള വിദ്യാര്ത്ഥികള് വിവിധ വിമാനങ്ങളിലും ട്രെയിനുകളിലുമായി ഇന്ന് നാട്ടിലേക്ക് തിരിക്കും.
ഇന്ത്യാ-പാക് സംഘര്ഷാവസ്ഥയുടെ പശ്ചാത്തലത്തില് അതിര്ത്തി സംസ്ഥാനങ്ങളിലെ കേരളീയര്ക്കും മലയാളി വിദ്യാര്ഥികള്ക്കും സഹായവും വിവരങ്ങളും ലഭ്യമാക്കുന്നതിനായി മുഖ്യമന്ത്രി പിണറായി വിജയന്റെ നിര്ദേശ പ്രകാരം ന്യൂഡല്ഹിയിലെ കേരള ഹൗസില് 24 മണിക്കൂറും പ്രവര്ത്തിക്കുന്ന കണ്ട്രോള് റൂം തുറന്നിരുന്നു.
അഡീഷണല് റസിഡന്റ് കമ്മീഷണര് ചേതന് കുമാര് മീണയുടെ നേതൃത്വത്തില് കണ്ട്രോളര് എ എസ് ഹരികുമാര്, ലെയ്സണ് ഓഫീസര് രാഹുല് കെ ജെയ്സ്വാര്, നോര്ക്ക ഡവല്പ്പമെന്റ് ഓഫീസര് ജെ ഷാജിമോന്, പി ഡബ്ല്യു ഡി അസിസ്റ്റന്റ് എക്സിക്യൂട്ടീവ് എഞ്ചിനീയര് ബി ബൈജു, അസിസ്റ്റന്റ് എഞ്ചിനീയര്മാരായ എന് ശ്രീഗേഷ്, സി. മുനവര് ജുമാന്, ടൂറിസം ഇന്ഫര്മേഷന് ഓഫീസര് കെ സുനില്കുമാര് കെ എസ് ഇ ബി റസിഡന്റ് എഞ്ചിനീയര് ഡെന്നീസ് രാജന് ഐ & പി ആര് ഡി അസിസ്റ്റന്റ് എഡിറ്റര് രതീഷ് ജോണ്, അസിസ്റ്റന്റ് ലെയ്സണ് ഓഫീസര്മാരായ, റ്റി ഒ ജിതിന് രാജ്, പി ആര് വിഷ്ണുരാജ്, എസ് സച്ചിന് , ജയരാജ് നായര് , ആര് അതുല് കൃഷ്ണന്, എന്നിവരെ കണ്ട്രോള് റൂം പ്രവര്ത്തനങ്ങള് ഏകോപിപ്പിക്കുന്നതിനായി നിയോഗിച്ചുവെന്നും മുഖ്യമന്ത്രിയുടെ ഓഫീസ് അറിയിച്ചു. കണ്ട്രോള് റൂം ഹെല്പ്പ് ലൈന് നമ്പര്. 01123747079.