ഉരുള്പൊട്ടല് ദുരന്തബാധിതരുടെ പുനരധിവാസം സമയബന്ധിതമായി പൂര്ത്തിയാക്കും: മുഖ്യമന്ത്രി
മുണ്ടക്കൈ, ചൂരല്മല ഉരുള്പൊട്ടല് ദുരന്ത ബാധിതരുടെ പുനരധിവാസം സമയബന്ധിതമായി പൂര്ത്തിയാക്കുമെന്ന് മുഖ്യമന്ത്രി പിണറായി വിജയന്റെ ഓഫീസ് അറിയിച്ചു. താമസത്തിനുള്ള മാസ വാടക തുക അടിയന്തരമായി ലഭ്യമാക്കാനും മുഖ്യമന്ത്രി നിര്ദ്ദേശം നല്കി.
ദുരന്തബാധിതര്ക്കുള്ള ടൗണ്ഷിപ്പ് നിര്മാണ പ്രവര്ത്തന പുരോഗതി വിലയിരുത്തുന്നതിന് മുഖ്യമന്ത്രിയുടെ കോണ്ഫറന്സ് ഹാളില് ചേര്ന്ന യോഗത്തിലാണ് നിര്ദേശം.
ടൗണ്ഷിപ്പ് നിര്മാണത്തിന് ഭരണ, സാങ്കേതിക, സാമ്പത്തിക അനുമതികള് നല്കുന്നതിന് സമയക്രമം നിശ്ചയിച്ചു നല്കി.
അനുമതിയോടെ വേണ്ട മരങ്ങള് മുറിച്ചു മാറ്റുക, വൈദ്യുത വിതരണ സംവിധാനങ്ങള് പുനക്രമീകരിക്കുക, മുഖ്യമന്ത്രിയുടെ ദുരിതാശ്വാസ നിധിയില് നിന്നുള്ള സാമ്പത്തിക സഹായം, അവശിഷ്ടങ്ങള് നീക്കം ചെയ്ത് പുഴയുടെ ഒഴുക്ക് സുഗമമാക്കുക, ഉദ്യോഗസ്ഥരുടെ വിന്യാസം എന്നിവയില് നടപടികള് ബന്ധപ്പെട്ട വകുപ്പുകള് എത്രയും വേഗം പൂര്ത്തീകരിക്കണമെന്നും മുഖ്യമന്ത്രി ഉദ്യോഗസ്ഥര്ക്ക് നിര്ദ്ദേശം നല്കി.
റവന്യു വകുപ്പ് മന്ത്രി കെ രാജന്, ധനകാര്യ വകുപ്പ് മന്ത്രി കെ എന് ബാലഗോപാല്, ചീഫ് സെക്രട്ടറി ഡോ. എ ജയതിലക്, മുഖ്യമന്ത്രിയുടെ ചീഫ് പ്രിന്സിപ്പല് സെക്രട്ടറി കെഎം എബ്രഹാം, അഡീഷണല് ചീഫ് സെക്രട്ടറിമാര്, വകുപ്പ് സെക്രട്ടറിമാര്, ഉന്നത ഉദ്യോഗസ്ഥര് തുടങ്ങിയര് പങ്കെടുത്തു.