ഷൈന് ടോം ചാക്കോ പൊലീസിന് മുന്നില് ഹാജരായി; വിശദമായി ചോദ്യം ചെയ്യും
ലഹരി പരിശോധനയ്ക്കിടെ കൊച്ചിയിലെ ഹോട്ടല് മുറിയില് നിന്നും ഇറങ്ങിയോടിയ സംഭവത്തില് നടന് ഷൈന് ടോം ചാക്കോ പൊലീസിന് മുന്നില് ഹാജരായി. ഷൈനിന്റെ രക്ഷപ്പെടലിന് പിന്നിലെ കാരണം കൃത്യമായി ചോദിച്ചറിയാന് ആണ് പൊലീസിന്റെ നീക്കം.
ഹോട്ടല് മുറിയില് നിന്ന് ഇറങ്ങിയോടിയതിന് പിന്നില് എന്താണ് കാരണം എന്ന് വിശദീകരിക്കണമെന്ന് ആവശ്യപ്പെട്ട് പൊലീസ് നല്കിയ നോട്ടീസ് പ്രകാരമാണ് ഷൈന് ഹാജരായത്. ഹോട്ടല് മുറിയില് നിന്ന് ഇറങ്ങിയോടിയതുമായി ബന്ധപ്പെട്ട് പൊലീസ് ചോദ്യാവലി തയ്യാറാക്കിയിട്ടുണ്ട്. ഇതിന്റെ അടിസ്ഥാനത്തിലായിരിക്കും ചോദ്യം ചെയ്യല്. 32 ചോദ്യങ്ങളാണ് ഷൈനിനോട് ചോദിക്കാനായി പൊലീസ് തയ്യാറാക്കിയിട്ടുള്ളത്. ഇതിനായി ഷൈനിന്റെ ഒരു കഴിഞ്ഞ ഒരുമാസത്തെ ഫോണ് കോളുകള് ഉള്പ്പെടെ പൊലീസ് സംഘം പരിശോധിച്ചതായാണ് വിവരം. ഇക്കാലയളവില് ഷൈന് താമസിച്ച ആറ് ഹോട്ടലുകളില് നിന്നുള്ള സിസിടിവി ദൃശ്യങ്ങള് ഉള്പ്പെടെ പൊലീസ് സംഘം പരിശോധിച്ചിട്ടുണ്ട്.
സിറ്റി പോലീസ് ഡാന്സാഫ് സംഘം പരിശോധനയ്ക്കെത്തിയതറിഞ്ഞ് നടന് ഷൈന് ടോം ചാക്കോ കൊച്ചിയിലെ സ്വകാര്യ ഹോട്ടലിന്റെ മൂന്നാം നിലയില്നിന്ന് സാഹസികമായി ചാടി കടന്നുകളഞ്ഞ ദൃശ്യങ്ങള് പുറത്തുവന്നത് വലിയ വിവാദമായിരുന്നു.