കശ്മീരിൽ വിജയമുറപ്പിച്ച് മുതിർന്ന സിപിഎം നേതാവ് മുഹമ്മദ് യൂസുഫ് തരി​ഗാമി. തുട‌ച്ചയായി അഞ്ചാം തവണയാണ്  സി പി എം  കേന്ദ്ര കമ്മിറ്റി അം​ഗം കൂടിയായ തരി​ഗാമി കശ്മീരിലെ കുൽ​ഗാം മണ്ഡലത്തിൽ നിന്ന് വിജയിക്കുന്നത്. വോട്ടെണ്ണലിന്റെ തുടക്കം മുതൽക്കെ തന്നെ വ്യക്തമായ ലീഡോടെയാണ്  തരി​ഗാമി മുന്നേറിയിരുന്നത്. ഇന്ത്യ സഖ്യത്തിന്റെ ഭാ​ഗമായ നാഷണൽ കോൺഫറൻസിന്റെയും കോൺ​ഗ്രസിന്റെയും പിന്തുണയോടെയാണ് തരി​ഗാമിയുടെ വിജയം.

സ്വതന്ത്ര സ്ഥാനാർത്ഥി സയർ അഹമ്മദ് റഷി, പിഡിപിയുടെ മുഹമ്മദ് അമിൻ ധർ എന്നിവരെ പിന്തള്ളിയാണ് തരി​ഗാമി വിജയമുറപ്പിച്ചത്. ജമാഅത്ത് ഇസ്ലാമിയെ നിരോധിച്ചതോടെ സ്വതന്ത്രനായി തിരഞ്ഞെടുപ്പിനെ നേരിട്ട മുൻ ജമാ അത്തെ ഇസ്ലാമി നേതാവ് സയർ അഹമ്മദ് റഷിയാണ് രണ്ടാം സ്ഥാനത്തെത്തിയത്. 1996ലാണ് ആദ്യമായി കശ്മീരിലെ കുൽ​ഗാം മണ്ഡലത്തിൽ നിന്ന് വിജയിക്കുന്നത് പിന്നീട് 2002, 2008, 2014 വർഷങ്ങളിൽ വിജയം ആവർത്തിക്കുകയായിരുന്നു. സയർ അഹമ്മദ് റെഷിയെ ബിജെപി രഹസ്യമായി പിന്തുണയ്ക്കുവെന്ന ആരോപണവും തരി​ഗാമി ഉന്നയിച്ചിരുന്നു.

കശ്മീരിലെ കർഷകമുന്നേറ്റങ്ങളുടെ നേതൃസ്ഥാനീയനാണ് തരി​ഗാമി. അദ്ദേഹത്തെ  വിജയത്തിലേക്ക് നയിച്ച കാരണവും ഇത് തന്നെയാവാം. കർഷക സമരത്തിന്റെ ഭാ​ഗമായതില്‍ പലപ്പോഴും ജയിൽവാസവും അനുഭവിക്കേണ്ടി വന്നിട്ടുണ്ട്. ജമ്മു കശ്മീരിന്റെ പ്രത്യേകപദവി പിൻവലിച്ച  2019ൽ തരി​ഗാമിയെ മാസങ്ങളോളം വീട്ടുതടങ്കലിലാക്കിയിരുന്നു. സുപ്രീം കോടതിയുടെ അനുമതിയോടെ സിപിഎം ജനറൽ സെക്രട്ടറിയായിരുന്ന സീതാറാം യെച്ചൂരി അന്ന് തരി​ഗാമിയെ സന്ദർശിക്കാൻ എത്തിയത് വലിയ വാർത്തയായിരുന്നു. സംസ്ഥാനത്തിന്റെ പ്രത്യേകപദവി പിൻവലിച്ചതുൾപ്പെടെയുള്ള പല സാഹചര്യങ്ങളിലും തരി​ഗാമി സ്വീകരിച്ച നിലപാട്, തരി​ഗാമിയ്ക്ക് ശക്തനായ പ്രതിപക്ഷ നേതാവെന്ന വിശേഷണവും നൽകുന്നു.