ഭൂമി തരംമാറ്റലിലൂടെ ഫീസ് ഇനത്തിൽ സർക്കാരിന് ലഭിച്ച 1,510 കോടി രൂപ കാർഷികാവശ്യങ്ങൾക്കായി വിനിയോ​ഗിക്കണമെന്ന് ഹൈക്കോടതി. നെൽകൃഷി സംരക്ഷണത്തിനായി വിനിയോ​ഗിക്കേണ്ടുന്ന കാർഷികാഭിവൃദ്ധി ഫണ്ടിലേക്കാണ് തുക കൈമാറേണ്ടത്. നാല് മാസത്തിനകം 25 ശതമാനം തുകയും ബാക്കി 75 ശതമാനം ഒരു വർഷത്തിനകം മൂന്ന് ​ഗഡുക്കളായും ചീഫ് ജസ്റ്റിസ് നിതിൻ ജാംദാർ, ജസ്റ്റിസ് എസ് മനു എന്നിവരടങ്ങുന്ന ബെഞ്ച് ഉത്തരവിട്ടു. 

ഡിസംബർ ഒന്ന് മുതൽ ലഭിക്കുന്ന ഫീസാണ് ഈ ഫണ്ടിലേക്ക് മാറ്റേണ്ടത്. ഫണ്ട് ഏതെല്ലാം ഇനത്തിലാണ് വിനിയോ​ഗിക്കേണ്ടതെന്ന് പിന്നീട് സർക്കാർ തീരുമാനിച്ച് റവന്യൂ വകുപ്പിന്റെ വെബ്സൈറ്റിൽ പ്രസിദ്ധപ്പെടുത്തണം. കാർഷികാഭിവൃദ്ധി ഫണ്ട് വർഷംതോറും സംസ്ഥാന ഓഡിറ്റ് വിഭാ​ഗം ഓഡിറ്റ് ചെയ്ത് കണക്കുകൾ പ്രസിദ്ധീകരിക്കണമെന്നും കോടതി വ്യക്തമാക്കി. തൃശൂർ സ്വദേശി ടി എൻ മുകുന്ദന്റെ ഹർജിയിലാണ് ഉത്തരവ്. ലാൻഡ് റവന്യു കമ്മീഷണർക്ക് ആയിരിക്കണം അക്കൗണ്ട് കൈകാര്യം ചെയ്യുന്നതിനുള്ള ചുമതലയെന്നും നിയമത്തിൽ പറഞ്ഞിട്ടുണ്ട്. അനധികൃതമായി നികത്തപ്പെട്ട കൃഷിഭൂമി പൂർവ്വ സ്ഥിതിയിലാക്കാൻ ഈ തുക ഉപയോ​ഗിക്കുകയാണ് ഉദ്ദേശം. 

തുക വകമാറ്റിയതിലെ ചട്ടലംഘനം കാണിക്കുന്ന ഓഡിറ്റ് റിപ്പോർട്ടും ലാൻഡ് റവന്യൂ കമ്മീഷണറുടെ കത്തും സർക്കാർ നാല് വർഷത്തോളം മൂടി വച്ചതായി പറയുന്നു. ലാൻഡ് റവന്യൂ കമ്മീഷണറായിരിക്കണം ഫണ്ട് വിനിയോ​ഗത്തിന്റെ നോഡൽ ഓഫീസ‌‍ർ എന്നതടക്കമുള്ള നിയമവ്യവസ്ഥകൾ ചൂണ്ടിക്കാട്ടി കമ്മീഷണർ രണ്ട് വട്ടം നൽകിയ കത്തുകൾ അവ​ഗണിക്കപ്പെട്ടിരുന്നു. എത്ര തുകയാണ് വക മാറ്റിയതെന്ന് ലാൻഡ് റവന്യു ഓഫീസറോട് സത്യവാങ്മൂലം സമർപ്പിക്കാൻ കോടതി ആവശ്യപ്പെട്ടപ്പോഴാണ് 1,510 കോടി രൂപ വക മാറ്റിയതായി വെളിപ്പെട്ടത്.