തുഷാര് ഗാന്ധിയെ സംഘപരിവാര് തടഞ്ഞ സംഭവം: അഭിപ്രായ സ്വാതന്ത്ര്യത്തെ ഹനിക്കുന്ന നടപടി അനുവദിക്കില്ലെന്ന് മുഖ്യമന്ത്രി
നെയ്യാറ്റിന്കരയില് ഗാന്ധിയന് ഗോപിനാഥന് നായരുടെ പ്രതിമ അനാച്ഛാദനം ചെയ്ത് പ്രസംഗിക്കുമ്പോള് തുഷാര് ഗാന്ധി ആര്എസ്എസ് വിഷമാണെന്ന് പറഞ്ഞതിനെതിരെ ബിജെപി, ആര്എസ്എസ് പ്രവര്ത്തകര് രംഗത്തെത്തുകയും അദ്ദേഹത്തെ തടഞ്ഞുവയ്ക്കുകയും ചെയ്തതിനെ മുഖ്യമന്ത്രി പിണറായി വിജയന് വിമര്ശിച്ചു.
തുഷാര് ഗാന്ധിക്കെതിരായ സംഘപരിവാര് അതിക്രമം രാജ്യത്തിന്റെ മതനിരപേക്ഷതയ്ക്കും ജനാധിപത്യത്തിനും എതിരായ കടന്നാക്രമണമാണെന്ന് മുഖ്യമന്ത്രി പറഞ്ഞു. രാഷ്ട്രപിതാവ് മഹാത്മാഗാന്ധിയുടെ കൊച്ചുമകനും പൊതുപ്രവര്ത്തകനുമായ തുഷാര് ഗാന്ധി വര്ക്കല ശിവഗിരിയിലെ ഗാന്ധി - ശ്രീനാരായണ ഗുരു സംവാദത്തിന്റെ നൂറാം വാര്ഷികം ഉദ്ഘാടനം ചെയ്യാനും ഗാന്ധിയന് ഗോപിനാഥന് നായരുടെ പ്രതിമ അനാച്ഛാദനത്തിനുമാണ് അദ്ദേഹം കേരളത്തില് എത്തിയത്.
മഹാത്മാഗാന്ധിയും ശ്രീനാരായണഗുരുവും കൂടിക്കാഴ്ച നടത്തിയ ചരിത്ര സംഭവം അനുസ്മരിക്കുന്ന ഘട്ടത്തിലാണ് ഈ സന്ദര്ശനം. അപ്പോഴാണ് ഗാന്ധിക്കെതിരെ ആര്എസ്എസ് പരസ്യമായ കടന്നാക്രമണം നടത്തിയതെന്ന് മുഖ്യമന്ത്രി പറഞ്ഞു.
ഗാന്ധിജിയെ വധിച്ചവരുടെ മാനസികാവസ്ഥയില് നിന്ന് ഒട്ടും വിഭിന്നമല്ല ഈ വിദ്രോഹ സമീപനത്തിന് പിന്നിലുള്ളവരുടെതെന്നും ഇത് അപലപനീയമാണെന്നും മുഖ്യമന്ത്രി പറഞ്ഞു.
അഭിപ്രായ സ്വാതന്ത്ര്യത്തെ ഹനിക്കുന്ന നടപടി ജനാധിപത്യ സമൂഹത്തില് അനുവദിക്കാനാവില്ല. ഇത്തരം പ്രവണതകള്ക്കെതിരെ നിയമപരവും ജനാധിപത്യപരവുമായ നടപടിയുണ്ടാവും. പൊതുജനാഭിപ്രായം വളര്ത്തി സമൂഹമാകെ ഇത്തരം ചെയ്തികളെ ഒറ്റപ്പെടുത്തുകയും വേണം.
രാജ്യത്തിന്റെ ആത്മാവിന് വര്ഗീയതയുടെ അര്ബുദബാധയുണ്ടാവുന്നു എന്ന ആശങ്കയാണ് തുഷാര് ഗാന്ധി പങ്കുവെച്ചത്. നമ്മുടെ സംസ്കാരം വിരുദ്ധ അഭിപ്രായങ്ങളെയും ബഹുമാനിക്കുന്നതാണ്. ആ സംസ്കാരത്തെ അപകീര്ത്തിപ്പെടുത്തുക കൂടിയാണ് സംഘപരിവാര്. പ്രകോപനത്തിന് വശംവദനാവാതെ ഗാന്ധിജിക്ക് ജയ് വിളിച്ചു മടങ്ങുകയാണ് തുഷാര് ഗാന്ധി ചെയ്തത്. കേരളത്തില് എത്തുന്ന ദേശീയ-അന്തര്ദ്ദേശീയ വ്യക്തിത്വങ്ങളുടെ വഴി തടയുന്നതുപോലുള്ള നീക്കങ്ങള് അനുവദിക്കില്ലെന്നും മുഖ്യമന്ത്രി പറഞ്ഞു.
മതേതര ജനാധിപത്യ സമൂഹത്തിന്റെ ശക്തമായ പ്രതിഷേധം ഈ സംഭവത്തില് ഉയരേണ്ടതാണ്. ജനാധിപത്യം നിലനില്ക്കണമെന്നാഗ്രഹിക്കുന്ന ഒരു വ്യക്തിയും സമൂഹ വിഭാഗവും രാഷ്ട്രീയ പ്രസ്ഥാനവും മൗനം പാലിച്ചു കൂടാത്ത സന്ദര്ഭമാണിത്. ആ ബോധവും അതില് നിന്നുളവാകുന്ന ശക്തമായ പ്രതിഷേധവും പൊതുമണ്ഡലത്തില് ഉണ്ടായാലേ നമ്മുടെ അഭിപ്രായപ്രകടന സ്വാതന്ത്ര്യമടക്കം സംരക്ഷിക്കാനാവൂവെന്നും പിണറായി വിജന് പറഞ്ഞു.