സംഘർഷം അവസാനിപ്പിക്കുന്നതിനായി അമേരിക്കയുടെ "സമാധാന പദ്ധതി"യിൽ യുക്രെയ്ൻ ഗണ്യമായ ഭേദഗതി വരുത്തി, റഷ്യയുടെ പരമാവധി  ആവശ്യങ്ങൾ നീക്കം ചെയ്തുവെന്ന് ദി ഗാർഡിയൻ റിപ്പോർട്ട് ചെയ്തു. യുക്രെയിനിയൻ പ്രസിഡൻറ്  വോളോഡിമർ സെലെൻസ്‌കി ഈ ആഴ്ച അവസാനം വൈറ്റ് ഹൗസിൽ ഡൊണാൾഡ് ട്രംപുമായി കൂടിക്കാഴ്ച നടത്തിയേക്കുമെന്ന് വൃത്തങ്ങൾ സൂചിപ്പിച്ചു. 

28 പോയിന്റുകളുള്ള യുഎസ്-റഷ്യൻ പദ്ധതി കഴിഞ്ഞ മാസം തയ്യാറാക്കിയത് വ്‌ളാഡിമിർ പുടിന്റെ പ്രതിനിധി കിറിൽ ദിമിട്രിയേവും ട്രംപിന്റെ പ്രതിനിധി സ്റ്റീവ് വിറ്റ്കോഫും ചേർന്നാണ്. കിഴക്കൻ ഡോൺബാസ് മേഖലയിലെ തങ്ങളുടെ നിയന്ത്രണത്തിലുള്ള നഗരങ്ങളിൽ നിന്ന് യുക്രെയ്‌ൻ പിന്മാറണമെന്നും സൈന്യത്തിന്റെ വലുപ്പം പരിമിതപ്പെടുത്തണമെന്നും നാറ്റോയിൽ ചേരരുതെന്നും യുക്രെയ്‌നിനോട് പദ്ധതിയിൽ ആവശ്യപ്പെടുന്നു.

യുഎസ് സ്റ്റേറ്റ് സെക്രട്ടറി മാർക്കോ റൂബിയോയുടെയും സെലെൻസ്‌കിയുടെ ചീഫ് ഓഫ് സ്റ്റാഫ് ആൻഡ്രി യെർമാക്കിന്റെയും നേതൃത്വത്തിൽ സ്വിറ്റ്‌സർലൻഡിൽ ഞായറാഴ്ച നടന്ന ചർച്ചകളിൽ പദ്ധതിയിൽ കാര്യമായ പരിഷ്‌ക്കരണം നടത്തി. ഇപ്പോൾ അതിൽ 19 പോയിന്റുകൾ മാത്രമേ ഉൾപ്പെടുത്തിയിട്ടുള്ളൂ.