വയനാട്ടിലെ മേപ്പാടിയിലുണ്ടായ ഉരുള്‍പൊട്ടലില്‍ മുണ്ടക്കൈയില്‍ മലയ്ക്ക് മുകളില്‍ നിരവധി പേര്‍ കുടുങ്ങിക്കിടക്കുന്നതായി വിവരം. ട്രീവാലി റിസോര്‍ട്ടിന് മുകളില്‍ മുന്നൂറോളം പേരുണ്ടെന്നും വീണ്ടും ഉരുള്‍പൊട്ടിയെന്ന് കേട്ടതോടെ രക്ഷാപ്രവര്‍ത്തകര്‍ തിരിച്ചുപോയതായും നാട്ടുകാര്‍ പറഞ്ഞു. പ്രായമായവരും സ്ത്രീകളും രോഗികളും ഉള്‍പ്പെടെ നിരവധി പേരാണ് റിസോര്‍ട്ടില്‍ കുടുങ്ങിക്കിടക്കുന്നത്. നിരവധി പേര്‍ ഒലിച്ചുപോയി. അനേകം കുടുംബങ്ങള്‍ കുടുങ്ങിക്കിടക്കുകയാണ്. പ്രദേശത്ത് വീണ്ടും മഴ കനത്തതോടെ വലിയ ആശങ്കയിലാണ് നാട്ടുകാര്‍.

 ഉരുള്‍പൊട്ടലുണ്ടായതോടെ നാട്ടുകാര്‍ റിസോര്‍ട്ടിനു മുകളിലേക്ക് ഓടിക്കയറുകയായിരുന്നു. ഉരുള്‍പൊട്ടലില്‍ വിവിധയിടങ്ങളിലായി 250 പേര്‍ കുടുങ്ങി്ക്കിടക്കുന്നതായി സംസ്ഥാന സര്‍ക്കാര്‍ അറിയിച്ചെന്ന് സൈന്യം പ്രതികരിച്ചു