കൗമാരക്കാർക്കുള്ള  എംപോക്സ് വാക്സിന് അം​ഗീകാരം നൽകി ലോകാരോ​ഗ്യ സംഘടന. എംപോക്സ് വ്യാപനം കൂടിയ സാഹചര്യത്തിൽ ഇത് ഏറ്റവും കൂടുതലായി ബാധിക്കാൻ സാധ്യതയുള്ള 12 മുതൽ 17 വയസ് വരെയുള്ള കുട്ടികൾക്ക് വേണ്ടിയുള്ള വാക്സിനാണ് അംഗീകാരം നൽകിയത്.

ബവേറിയൻ നോർഡിക്കാണ്  ഈ വാക്സിൻ നിർമ്മിച്ചിരിക്കുന്നത്. കൗമാരക്കാർക്കുള്ള ജെന്നിയോസ് വാക്സിന് പ്രീക്വാളിഫിക്കേഷൻ നൽകിയതായി ലോകാരോ​ഗ്യ സംഘടന പറയുന്നു.  കോം​ഗോയിലും തൊട്ടടുത്ത രാജ്യങ്ങളിലും എംപോക്സ് വ്യാപിച്ചതിനെ തുടർന്ന് രോ​ഗത്തെ ആ​ഗോള പൊതുജനാരോ​ഗ്യ അടിയന്തരാവസ്ഥയായി പ്രഖ്യാപിച്ചിരുന്നു. പനിയും ദേഹമാസകലമുണ്ടാവുന്ന പഴുപ്പ് നിറഞ്ഞ കുരുക്കളുമാണ് രോ​ഗലക്ഷണം. കൗമാരക്കാർക്കുള്ള വാക്സിന് ആവശ്യമായ മരുന്നിനുള്ള അനുമതി  യൂറോപ്യൻ യൂണിയൻ സെപ്തംബറിൽ നൽകിയതാണ് ഡബ്ലുഎച്ച്ഒയെ ഈ തീരുമാനത്തിലേക്ക് നയിച്ചത്.

ഡാനിഷ് ബയോടെക് സ്ഥാപനമായ ബവേറിയൻ നോർഡിക് രണ്ട് മുതൽ 12 വരെയുള്ള കുട്ടികളിൽ വാക്സിന്റെ സുരക്ഷ ഉറപ്പു വരുത്തുന്നതിൽ ക്ലിനിക്കൽ ട്രയലിന് ഒരുങ്ങുകയാണ്. ഇത് വാക്സിന്റെ ഉപയോ​ഗം വ്യാപിപ്പിക്കാൻ സഹായകമാകും. കോളിഷൻ ഫോർ എപ്പിഡമിക് പ്രിപ്പയ‌‍ർഡ്നെസ് ഫോർ ഇന്നൊവേഷൻ ആണ് ട്രയലിന് ആവശ്യകമായ ഭാ​ഗിക ധനസഹായം നൽകുക, ഈ മാസം തന്നെ ട്രയൽ ആരംഭിക്കുമെന്ന് കരുതുന്നു.

യുഎസിലെ ഫുഡ് ആന്റ് ഡ്ര​ഗ് അഡ്മിനിസ്ട്രേഷനും ബവേറിയൻ വാക്സിന് അനുമതി നൽകിയിരുന്നു. എന്നാൽ ഇത് 18 വയസിനും അതിന് മുകളിലുള്ളവർക്കും മാത്രമേ ഉപയോ​ഗിക്കാൻ അനുമതി ഉണ്ടായിരുന്നുള്ളൂ. 2022ൽ എംപോക്സ് പൊട്ടിപുറപ്പെട്ട സാഹചര്യത്തിൽ അടിയന്തിരഘട്ടങ്ങളിൽ കൗമാരക്കാരിൽ ഇവ ഉപയോ​ഗിക്കാനുള്ള അനുമതി നൽകിയിരുന്നു. ജപ്പാനിലെ കെ എം ബയോലോജിക്സിൽ നിർമ്മിതമായ  എൽസി16  എന്ന മറ്റൊരു എംപോക്സ് വാക്സിൻ നിലവിൽ കുട്ടികളിൽ ഉപയോ​ഗിച്ച് വരുന്നുണ്ട്.