സാങ്കേതികവിദ്യാധിഷ്ഠിത സമ്പദ്‌വ്യവസ്ഥയുടെയും ആഗോളവല്‍ക്കരണത്തിന്റെയും ആവിര്‍ഭാവം നിരവധി അനുഗ്രഹങ്ങളും വിരോധാഭാസങ്ങളും കൊണ്ടുവരുന്നുണ്ട്. ലോകമെമ്പാടുമുള്ള ഈ സംഭവവികാസങ്ങള്‍ക്കിടയില്‍ ഒരുപക്ഷേ ഏറ്റവും കൂടുതല്‍ കണ്ണുകളെ പിടികൂടിയ ഒരു മേഖലയാണ് ആര്‍ട്ടിഫിഷ്യല്‍ ഇന്റലിജന്‍സ് (AI). മറ്റേതൊരു മേഖലയേയും നവീകരിക്കുന്നതിന്റെ ഭാഗമായി അവിടങ്ങളില്‍ പ്രത്യക്ഷവും പരോക്ഷവുമായി പ്രകടമാവുന്ന കുറവും കൂടുതലും ഇവിടെയും കാണാം. ആര്‍ട്ടിഫിഷ്യല്‍ ഇന്റലിജന്‍സിന് (AI) അതിന്റേതായ ഗുണങ്ങളും ദോഷങ്ങളുമുണ്ട്. പോസിറ്റീവ് വശത്ത്, ചിലവ് കുറഞ്ഞതും സമയം ലാഭിക്കുന്നതിനൊപ്പം കൂടുതല്‍ കാര്യക്ഷമതയോടെ തങ്ങളുടെ ജോലി പൂര്‍ത്തിയാക്കാന്‍ അവയ്ക്ക് സാധിക്കും. എന്നാല്‍ നെഗറ്റീവ് വശത്ത്, ഇത് ലോകമെമ്പാടുമുള്ള ദശലക്ഷക്കണക്കിന് ആളുകളുടെ തൊഴില്‍ സാധ്യതകള്‍ അക്ഷരാര്‍ത്ഥത്തില്‍ കവര്‍ന്നെടുക്കും. ഇക്കാര്യത്തില്‍ ആഗോള തലത്തിലെ പഠനങ്ങളെല്ലാംതന്നെ സൂചിപ്പിക്കുന്നതും തൊഴില്‍ സാധ്യതയുടെ ഗണ്യമായ കുറവിനെ തന്നെയാണ്. മക്കിന്‍സി ഗ്ലോബല്‍ ഇന്‍സ്റ്റിറ്റ്യൂട്ടിന്റെ പഠനം പറയുന്നത് 2030 ഓടെ ലോകമെമ്പാടുമുള്ള 40 ദശലക്ഷത്തിനും 160 ദശലക്ഷത്തിനും ഇടയില്‍ വരുന്ന ആളുകള്‍ക്ക് അവരുടെ തൊഴില്‍ മാറേണ്ടിവരുമെന്നാണ്. കൂടാതെ ഓട്ടോമേഷനെ ആശ്രയിക്കുന്ന, റോബോട്ടിക്‌സ് സയന്‍സുമായി ബന്ധപ്പെട്ട എഞ്ചിനീയറിംഗ് ജോലികള്‍ ഉയര്‍ന്ന ഡിമാന്‍ഡിന് കാരണമായേക്കാം. ഇത് കൂടാതെ നീതി ആയോഗ് അതിന്റെ 'നാഷണല്‍ സ്ട്രാറ്റര്‍ജി ഓണ്‍ ആര്‍ട്ടിഫിഷ്യല്‍ ഇന്റലിജന്‍സ്' എന്ന തലക്കെട്ടിലുള്ള റിപ്പോര്‍ട്ടില്‍, ആര്‍ട്ടിഫിഷ്യല്‍ ഇന്റലിജന്‍സിന്റെ വെല്ലുവിളികള്‍, ഫോക്കസ് ഏരിയകള്‍, ആഗോള വികസനം എന്നിവയെക്കുറിച്ച് സമഗ്രമായിത്തന്നെ ചര്‍ച്ച ചെയ്യുന്നുണ്ട്. മാത്രവുമല്ല ഡാറ്റയുടെ സ്വകാര്യത, ആര്‍ട്ടിഫിഷ്യല്‍ ഇന്റലിജന്‍സിലെ ഗവേഷണത്തിന്റെ കുറഞ്ഞ തീവ്രത, ബിസിനസ് പ്രക്രിയകളില്‍ ആര്‍ട്ടിഫിഷ്യല്‍ ഇന്റലിജന്‍സ് സ്വീകരിക്കുന്നതിനുള്ള കുറഞ്ഞ അവബോധം എന്നിങ്ങനെ ഇന്ത്യയില്‍ ഈ മേഖലയുടെ വിജയകരമായ വിന്യാസത്തില്‍ ചില പ്രധാന തടസ്സങ്ങളാകുമെന്ന് കൂടി ഈ റിപ്പോര്‍ട്ട് പ്രസ്താവിക്കുന്നുണ്ട്.

ആര്‍ട്ടിഫിഷ്യല്‍ ഇന്റലിജന്‍സും കോടതി വ്യവഹാരങ്ങളും

ആഗോളതല നിയമവ്യവസ്ഥയില്‍ ആര്‍ട്ടിഫിഷ്യല്‍ ഇന്റലിജന്‍സിന്റെ (AI) ഉപയോഗം ഇപ്പോഴും തുടക്കഘട്ടത്തിലാണ്. എന്നാല്‍ പല രാജ്യങ്ങളും നിയമസ്ഥാപനങ്ങളും ജുഡീഷ്യറികളും ഒരുപോലെ സാവധാനം ഇവയുടെ പ്രവര്‍ത്തനത്തെ ഇന്ന് സ്വാഗതം ചെയ്യുന്നുമുണ്ട്. വിധിന്യായങ്ങളിലെ നിയമപരമായ ബലഹീനതകള്‍ ചൂണ്ടിക്കാണിച്ചും, കരാര്‍ രേഖകള്‍ തയ്യാറാക്കുന്നതിനുള്ള സഹായമായും, മറ്റു നിയമപ്രവര്‍ത്തനങ്ങളില്‍ ഇവയ്ക്കുള്ള സൂക്ഷ്മത, നിയമപരമായ വിശകലനങ്ങള്‍ നല്‍കുന്നതിലെ മികവ്, തുടങ്ങിയവയിലൂടെ അഭിഭാഷകര്‍ക്ക് ചിലവ് കുറഞ്ഞ പരിഹാരങ്ങള്‍ ഇത് പ്രദാനം ചെയ്യുന്നു. അതുപോലെ, ജുഡീഷ്യറിയുടെ ഭാരം കുറയ്ക്കുവാന്‍ വേണ്ട കാരണങ്ങള്‍ ഇവയുടെ വേഗതയിലുള്ള പ്രവര്‍ത്തനങ്ങള്‍ക്ക് കഴിയും. പ്രത്യേകിച്ച് അത്തരം സന്ദര്‍ഭങ്ങളില്‍ നിസ്സാരമായ കുറ്റകൃത്യങ്ങള്‍ ഇവ അനായാസം കൈകാര്യം ചെയ്യുന്നു. മറ്റു സങ്കീര്‍ണ്ണമായ കേസുകള്‍ മനുഷ്യ ജഡ്ജിമാര്‍ തീര്‍പ്പ് കല്‍പിക്കുകയും ചെയ്യുന്നു. AI റോസ് പോലെയുള്ള വെബ്ബ് ഡവലപേഴ്സ് വികസിപ്പിച്ചെടുത്ത IBM, പത്യേകിച്ച് ഇന്ന് USA യില്‍ നിയമപരമായ കരാറുകള്‍ പരിശോധിക്കുന്നതിനും, നിയമ ഗവേഷണം നടത്തുന്നതിനും, കേസ് നിയമങ്ങള്‍ സംക്ഷിപ്തമായി സംഗ്രഹിക്കുന്നതിനും ഉപയോഗിക്കുന്നു. അതുപോലെ, Linklaters LLP എന്ന ഒരു ബഹുരാഷ്ട്ര നിയമ സ്ഥാപനം ഫലപ്രദമായ മാനേജ്‌മെന്റ് കരാര്‍, നിയമപരമായ ഡാറ്റയുടെ സഹായം എന്നിവ നല്‍കുക എന്ന ലക്ഷ്യത്തോടെ Nakhoda എന്ന ആര്‍ട്ടിഫിഷ്യല്‍ ഇന്റലിജന്‍സ് പ്രോഗ്രാം വികസിപ്പിക്കുകയും ചെയ്യുന്നു. ഇത്തരത്തില്‍ പുതിയ രീതികളുടെ സാധ്യതയെ ലോകം പൂര്‍ണാര്‍ത്ഥത്തില്‍ സ്വാഗതം ചെയ്യുകയാണ് ഇവിടെ. വ്യക്തമായി പറഞ്ഞാല്‍, കാലത്തിനൊത്ത് സഞ്ചരിക്കുക, അതിലൂടെ പുരോഗതി കൈവരിക്കുക എന്ന രീതിയാണ് ഇന്നത്തെ ലോകത്തിന്റെ പുതിയ സഞ്ചാരം എന്ന് ചുരുക്കം.

^{REPRESENTATIONAL IMAGE: TWITTER}
ടൈപ്പ്റൈറ്ററുകള്‍ മുതല്‍ കമ്പ്യൂട്ടര്‍ വരെയും, പണ്ട് നിയമ ഗവേഷണത്തിന് ലൈബ്രറികള്‍ മാത്രം ഉപയോഗിക്കുന്നത് മുതല്‍ ഇന്ന് പ്രസക്തമായ കേസ് നിയമങ്ങള്‍ കണ്ടെത്തുന്നതിന് ഓണ്‍ലൈന്‍ പോര്‍ട്ടലുകള്‍ ഉപയോഗിക്കുന്നത് വരെയും, ഫാക്സ് മെഷീനുകള്‍ മുതല്‍ ഇ-മെയിലുകള്‍ വരെയുമുള്ള സാങ്കേതികവിദ്യയുടെ ഓരോ മുന്നേറ്റവും നിയമരംഗത്ത് വിപ്ലവകമായ മാറ്റം വരുത്തി എന്നുവേണം പറയാന്‍. നിയമ സേവനം എന്നത് ലോകത്തിലെ തന്നെ ഏറ്റവും വലിയ വിപണികളില്‍ ഒന്നാണ്, എന്നാല്‍ അതേസമയം അതിന്റെ പ്രവര്‍ത്തനത്തില്‍ ഇന്നും ഡിജിറ്റലൈസ് ചെയ്യപ്പെടാത്ത പല നാടുകളുമുണ്ടന്ന് പറയപ്പെടുന്നു. അത്തരം നാടുകളില്‍ ഈ മേഖലയോടുള്ള അവരുടെ സമീപനം പരമ്പരാഗതവും പുതിയ രീതിയിലുള്ള ഉപകരണങ്ങളുമായി പൊരുത്തപ്പെടുന്നതില്‍ മന്ദഗതിയിലുള്ളതുമാണ്. നിലവിലെ ഈ മേഖലയിലെ പ്രവര്‍ത്തന രീതിയെ നാം വിലയിരുത്തുമ്പോള്‍, പ്രത്യേകിച്ച് ഇന്ത്യന്‍ നിയമ സാഹചര്യങ്ങളെ കൂടുതലായും പഠിക്കുമ്പോള്‍ നമുക്ക് ബോധ്യപ്പെടുന്നതാണ്. ഒരു കേസിലെ വിവരശേഖരണം നടത്തുന്ന രീതി, അതിലെ ഡാറ്റ ക്രോഡീകരിക്കുന്നത്, അതുമായി ബന്ധപ്പെട്ട മറ്റു പ്രവര്‍ത്തനങ്ങള്‍ എല്ലാം തന്നെ പഴഞ്ചന്‍ രീതിയാണ് ഇന്നും പിന്തുടരുന്നത്. ഇതു കാരണം ഒരു കേസ് തീര്‍പ്പ് കല്‍പ്പിക്കുന്നതിനു വേണ്ടി എടുക്കുന്നത് വലിയ കാലതാമസമാണ്. ഈ രീതിയെ മാറ്റാന്‍ ആര്‍ട്ടിഫിഷ്യല്‍ ഇന്റലിജന്‍സിന് കഴിവുണ്ടെന്ന വസ്തുത നാം അംഗീകരിക്കേണ്ട സമയമം ഇപ്പോള്‍ അതിക്രമിച്ചിരിക്കുന്നു. പൊതുഭരണത്തിലെ കാര്യക്ഷമതയും സുതാര്യതയും വസ്തുനിഷ്ഠതയും പ്രോത്സാഹിപ്പിക്കുന്നിടത്തോളം സാങ്കേതിക വിദ്യയ്ക്ക് എക്കാലത്തും പ്രസക്തിയുണ്ട്. സുപ്രീം കോടതി ചീഫ് ജസ്റ്റിസ് ഡി.വൈ.ചന്ദ്രചൂഡിന്റെ വാക്കുകള്‍ക്ക് ഇവിടെ പ്രസക്തി ഏറെയാണ്, 'ജഡ്ജിമാരെയോ മനുഷ്യമനസ്സുകളെയോ മാറ്റിസ്ഥാപിക്കാന്‍ AI ക്ക് കഴിവില്ലെങ്കിലും ജോലിയും പ്രക്രിയകളും വിധിന്യായങ്ങളുമെല്ലാം പുനഃപരിശോധിക്കുന്നതിനോ പുനര്‍മൂല്യനിര്‍ണയം നടത്തുന്നതിനോ ജഡ്ജിമാര്‍ക്ക് ഒരു സഹായമാകും' എന്ന ആശയത്തിലേക്ക് അദ്ദേഹത്തിന്റെ ഈ വാക്കുകള്‍ വെളിച്ചം വീശുന്നു. ആത്യന്തികമായി സാധാരണ ജനങ്ങള്‍ക്ക് പെട്ടന്ന് നീതി ലഭ്യമാക്കുക എന്നതാണ് പ്രധാന ലക്ഷ്യം.

ഇന്ത്യയുടെ ആര്‍ട്ടിഫിഷ്യല്‍ ഇന്റലിജന്‍സ് ചട്ടക്കൂടിനായി എടുത്ത പ്രാഥമിക ചുവടുവയ്പ്പില്‍ ഇതിനെക്കുറിച്ച് ആഴത്തില്‍ പഠിക്കുന്നതിനായി തെരഞ്ഞെടുത്തത് AI ടാസ്‌ക് ഫോഴ്‌സ് റിപ്പോര്‍ട്ട് ആയിരുന്നു. ടാറ്റ സണ്‍സ് ചെയര്‍മാന്‍ എന്‍.ചന്ദ്രശേഖരന്റെ നേതൃത്വത്തില്‍ വാണിജ്യ, വ്യവസായ മന്ത്രാലയമാണ് ഈ ടാസ്‌ക് ഫോഴ്‌സ് രൂപീകരിച്ചത്. AI ഉപയോഗിക്കുന്നതിന്റെ സാമ്പത്തിക നേട്ടങ്ങള്‍ വിശകലനം ചെയ്യുന്നതിനും അത് ഇന്ത്യയ്ക്ക് എങ്ങനെ പ്രയോജനം ചെയ്യുമെന്ന് കാണുന്നതിനും വേണ്ടിയാണ് ഇങ്ങനെയൊരു പഠനം നടത്തിയത്. 'നമ്മുടെ സാമ്പത്തിക, രാഷ്ട്രീയ, നിയമപരമായ ചിന്താ പ്രക്രിയകളില്‍ AI ഉള്‍പ്പെടുത്തുക, അതുവഴി AI യുടെ സമ്പന്നമായ സമ്പദ്‌വ്യവസ്ഥകളുടെ നേതാക്കളില്‍ ഒരാളായി ഇന്ത്യ മാറുക എന്ന കാഴ്ചപ്പാടാണ് ടാസ്‌ക് ഫോഴ്‌സ് പ്രസ്താവിച്ചത്.

^{ജസ്റ്റിസ് ഡി.വൈ.ചന്ദ്രചൂഡ് | PHOTO: PTI}
നിയമവ്യവസായത്തിന്റെ സ്വഭാവം ഇപ്പോഴും അധ്വാന തീവ്രതയിലേക്ക് ചായ്‌വുള്ളതാണെന്ന് പറയപ്പെടുന്നതിനാല്‍ മുഴുവന്‍ പ്രക്രിയയും സ്വമേധയാ ചെയ്യുന്നതാണ് ഇന്ത്യന്‍ നിയമ തൊഴില്‍. അതിനാല്‍, AI അതിന്റെ പ്രാരംഭഘട്ടത്തിലാണ്, കാരണം പഴയ തലമുറയിലെ മിക്ക വക്താക്കളും സാങ്കേതികവിദ്യ വ്യാപകമായ രീതിയില്‍ ഉപയോഗിക്കേണ്ടതില്ലെന്ന അഭിപ്രായക്കാരാണ്. കാരണം അത് മനുഷ്യനെ ഏറ്റെടുക്കുകയും സര്‍ഗാത്മക കഴിവുകളില്‍ നിന്ന് അകറ്റുകയും ചെയ്യും. അങ്ങനെ നിയമത്തില്‍ AI എന്ന ആശയത്തില്‍ നിന്ന് പിന്മാറുകയും ചെയ്യുന്നു എന്നത് ഒരു യാഥാര്‍ത്ഥ്യമാണ്. സാങ്കേതിക വിദഗ്ധരായ നിരവധി അഭിഭാഷകരും അതുപോലെ തന്നെ മറ്റുള്ളവരുടെ മേല്‍ മുന്‍തൂക്കം നേടുന്നതിനായി സാങ്കേതിക മേഖലയിലെ മുന്നേറ്റങ്ങള്‍ പരമാവധി പ്രയോജനപ്പെടുത്തുന്നവരുമായ വന്‍കിട നിയമ സ്ഥാപനങ്ങള്‍ ഇന്ന് ലോകത്ത് നിലവിലുണ്ട്. ഇന്ത്യന്‍ നിയമസംവിധാനം വിശാലമാണെന്ന് നമുക്കെല്ലാവര്‍ക്കും അറിയാം, നമ്മുടെ ഭരണഘടന മാത്രമാണ് ലോകത്തിലെ ഏറ്റവും ദൈര്‍ഘ്യമേറിയത്, അതിനാല്‍ മാറുന്ന കാലത്തിനനുസരിച്ച് നിയമത്തില്‍ AI യുടെ ഉപയോഗത്തിലൂടെ ചലനാത്മക അന്തരീക്ഷത്തെ നേരിടേണ്ടത് അത്യന്താപേക്ഷിതമാണ്. നിയമ ഗവേഷണ മേഖലയിലെ അഭിഭാഷകര്‍ മെഷീന്‍ ലേണിംഗ് സാങ്കേതികവിദ്യ ഉപയോഗിക്കുന്നത് ഏതാനും കാലങ്ങള്‍ക്കുള്ളില്‍ നിയമപരമായ ഡൊമെയ്‌നിനെക്കുറിച്ച് സമാനതകളില്ലാത്ത ഉള്‍ക്കാഴ്ച നേടാന്‍ അവരെ സഹായിക്കും. AI ശക്തികള്‍ അംഗീകരിക്കുകയും അത് ആവേശത്തോടെ സ്വീകരിക്കുകയും ചെയ്യുന്ന സിറില്‍ അര്‍മാര്‍ചന്ദും (Cyril Armarchand ) മംഗള്‍ദാസുമാണ് (Mangaldas) അത്തരത്തിലുള്ള ഒരു സ്ഥാപനം. കിര (Kira) സിസ്റ്റംസ് നിര്‍മ്മിച്ച കാനഡ ആസ്ഥാനമായുള്ള മെഷീന്‍ ലേണിംഗ് സോഫ്റ്റ്‌വെയറായ 'കിര' യ്ക്ക് ലൈസന്‍സ് നല്‍കുന്ന ആദ്യ ഇന്ത്യന്‍ നിയമ സ്ഥാപനമായി CAM ചരിത്രം സൃഷ്ടിച്ചു. കൂടാതെ AI അധിഷ്ഠിത സോഫ്റ്റ്‌വെയര്‍ നിരവധി കാര്യങ്ങള്‍ ചെയ്യാന്‍ പ്രാപ്തമാണ്, അതുവഴി ദൈര്‍ഘ്യമേറിയ മനുഷ്യ-മണിക്കൂറുകള്‍ ലാഭിക്കുന്നു. നിയമപരമായ ഡോക്യുമെന്റുകള്‍ വിശകലനം ചെയ്യുന്നതിനും ഏതെങ്കിലും അപകടസാധ്യതയുള്ള മേഖലകള്‍ തിരിച്ചറിയുന്നതിനും കണ്ടെത്തുന്നതിനും 'കിര' സിസ്റ്റം ഉപയോഗിക്കുന്നു. കൂടാതെ നിയമപരമായ വിവിധ രേഖകളില്‍ നിന്ന് ഉപവാക്യങ്ങള്‍ വേര്‍തിരിച്ചെടുക്കാനും ഇത് ഉപയോഗിക്കുന്നു. AI സാങ്കേതിക വിദ്യയുടെ മേഖലയിലെ പുരോഗതിയോടെ, അഭിഭാഷകര്‍ ചെയ്യേണ്ട ഭാരിച്ച പേപ്പര്‍വര്‍ക്കിലൂടെയുള്ള മടുപ്പിക്കുന്ന ജോലികള്‍ ചെയ്യാന്‍ നേരത്തെ ആവശ്യമായിരുന്ന ദൈര്‍ഘ്യമേറിയ മനുഷ്യ-മണിക്കൂറുകള്‍ ഇത് കുറക്കുന്നു. പരമാവധി നേട്ടങ്ങള്‍ കൊയ്യുന്നതിനായി ഇത് ഉപയോഗിക്കുന്നതിലൂടെ നിയമവ്യവസായത്തിന് പ്രയോജനം കൈവരുന്ന വിവിധ മാര്‍ഗങ്ങള്‍ ഏറെയാണ്.

നിയമ ഗവേഷണ പ്രവര്‍ത്തനങ്ങള്‍

നിയമ ഗവേഷണത്തിന് ദൈര്‍ഘ്യമേറിയ മണിക്കൂറുകള്‍ ആവശ്യമാണ്, മാത്രമല്ല അതിന്റെ സങ്കീര്‍ണ്ണമായ സ്വഭാവം കാരണം ഏകതാനത കൈവരിക്കാനും കഴിയും, കൂടാതെ മിക്ക നിയമ സ്ഥാപനങ്ങളും പാലിക്കാന്‍ ആവശ്യപ്പെടുന്ന കര്‍ശനമായ സമയപരിധി കണക്കിലെടുത്ത് അവര്‍ക്ക് വേഗത്തിലുള്ളതും കൃത്യവുമായ നിയമ ഗവേഷണ പ്രവര്‍ത്തനങ്ങള്‍ ആവശ്യമാണ്. കാര്യക്ഷമതയും കൃത്യതയും ഗണ്യമായി മെച്ചപ്പെടുത്താന്‍ കഴിയുന്ന AI സോഫ്റ്റ്‌വെയര്‍ ഉപയോഗിച്ചാണ് ഈ വെല്ലുവിളിയെ നേരിടുന്നത്. ഒരു ക്ലിക്കിലൂടെ AI പ്രസക്തമായ കേസ് നിയമങ്ങള്‍ നല്‍കുന്നതിനാല്‍ ഇത് സമയം കുറയ്ക്കുന്നു. കരാര്‍ രേഖകള്‍ വേഗത്തില്‍ അവലോകനം ചെയ്യാനും വേഗത്തില്‍ വിധിന്യായങ്ങള്‍ നല്‍കുന്നതിന് ജഡ്ജിമാരെ സഹായിക്കുന്നതിനും ഇത് പ്രയോജനകരമാണ്. മെഷീന്‍ റണ്‍ സോഫ്റ്റ്‌വെയര്‍ ഉപയോഗിക്കുന്ന, അത്തരത്തിലുള്ള ഒരു കമ്പനിയാണ് (റോസ് ഇന്റലിജന്‍സ് സോഫ്റ്റ്‌വെയര്‍) ഇവ പ്രസക്തമായ ഡോക്യുമെന്റുകള്‍ ഹൈലൈറ്റ് ചെയ്യുന്നു. അതിനാല്‍, ശരിയായ സോഫ്റ്റ്‌വെയര്‍ ഉപയോഗത്തിലൂടെ നിയമ ഗവേഷണം ഒപ്റ്റിമൈസ് ചെയ്യാനും കാര്യക്ഷമത വളരെയധികം മെച്ചപ്പെടുത്താനും കഴിയും.

^{PHOTO: WIKI COMMONS}
കൃത്യമായ ശ്രദ്ധ

നിയമപരമായ പ്രാക്ടീഷണര്‍മാര്‍ക്ക് ഒന്നിലധികം നിയമപരമായ രേഖകള്‍ അവലോകനം ചെയ്യേണ്ടതിനാല്‍ ഡ്യൂ ഡിലിജന്‍സ് പ്രക്രിയയ്ക്ക് ദീര്‍ഘനേര ജോലി സമയം ആവശ്യമാണ്. അത്തരം പ്രധാനപ്പെട്ട എല്ലാ രേഖകളുടെയും പരിവര്‍ത്തനവും ഓര്‍ഗനൈസേഷനുമെല്ലാം തീര്‍ച്ചയായും ബുദ്ധിമുട്ടുള്ള ഒരു പ്രക്രിയയാണ്, അത് വളരെ സമയമെടുക്കും. എന്നിരുന്നാലും, AI സൊല്യൂഷനുകളിലൂടെ, കഠിനാധ്വാനത്തിന്റെ മടുപ്പിക്കുന്ന ജോലി വളരെ വേഗത്തിലും കൂടുതല്‍ കൃത്യതയോടെയും കൈകാര്യം ചെയ്യാന്‍ കഴിയും. മെഷീന്‍ ലേണിംഗ് ടെക്നോളജിയുടെ സഹായത്തോടെ, നിയമപരമായ ഡോക്യുമെന്റുകള്‍ വളരെ വേഗത്തിലും കൃത്യതയോടെയും അവലോകനം ചെയ്യുന്ന ജോലികള്‍ AI സംവിധാനങ്ങള്‍ ചെയ്തതായി പഠനങ്ങള്‍ തെളിയിക്കുന്നു. കൃത്യമായ പരിശോധനകള്‍ കൃത്യമായി നിര്‍വഹിക്കുന്ന അത്തരത്തിലുള്ള ഒരു കമ്പനിയാണ് 'കിര സിസ്റ്റംസ്' ഇത് നേരിട്ട് അവലോകനം ചെയ്യുന്നതിനേക്കാള്‍ വളരെ വേഗത്തിലാണ്.

ചിലവ് കുറയ്ക്കുക, ഉല്‍പ്പാദനക്ഷമത വര്‍ദ്ധിപ്പിക്കുക

ടാസ്‌ക്കുകളും പ്രക്രിയകളും ഓട്ടോമേറ്റ് ചെയ്തുകൊണ്ട് നിയമവകുപ്പിനെ കാര്യക്ഷമമാക്കാന്‍ AI ക്ക് കഴിയും. ഇവയുടെ ഈ സാധ്യതകള്‍ പൂര്‍ണ്ണമായി പ്രയോജനപ്പെടുത്തുന്നതിന്, ഇന്‍-ഹൗസ് അഭിഭാഷകര്‍ സോഫ്റ്റ്‌വെയര്‍ ഉപയോഗിക്കാന്‍ തുടങ്ങണം. കാരണം, ഇത് ഒരു ഉപയോഗപ്രദമായ ഉപകരണമാണ്. ചിലവ് കുറയ്ക്കാനും, പുതിയ തന്ത്രങ്ങള്‍ കൊണ്ടുവരാനും ഇത് സഹായിക്കും, AI സോഫ്റ്റ്‌വെയറിന് ഇതിലെ തെറ്റുകള്‍ കണ്ടെത്താനാകും. അങ്ങനെ കൂടുതല്‍ കാര്യക്ഷമവും മികച്ചതുമായ സേവനം നല്‍കുകയും ചെയ്യുന്നു. മികച്ച AI കരാര്‍ അവലോകന സോഫ്റ്റ്‌വെയര്‍ ഉപയോഗിക്കേണ്ടത് ഇതിന്റെ ഭാഗമാണ്. കൊളംബിയ സര്‍വകലാശാലയുടെ സഹായത്തോടെ വികസിപ്പിച്ച ഇബ്രേവിയ (Ebrevia) എന്ന കമ്പനി, മെഷീന്‍ ലേണിംഗും നാച്വറല്‍ ലാഗ്വേജ് പ്രോസസ്സിംഗ് പോലുള്ള ഉപകരണങ്ങളും പ്രയോഗിക്കാന്‍ ലക്ഷ്യമിടുന്നു. കരാറുകള്‍ അവലോകനം ചെയ്യുന്നതിനായി ചിലവഴിക്കുന്ന സമയം കുറയ്ക്കുന്നതിന് AI നയിക്കുന്ന ഈ സോഫ്റ്റ്‌വെയര്‍, ഗവേഷണവും അവലോകന പ്രക്രിയയും വേഗത്തിലാക്കുക എന്നതാണ് ലക്ഷ്യം.

^{REPRESENTATIONAL IMAGE: WIKI COMMONS}
നിയമ പ്രമാണങ്ങളുടെ വിശകലനം

AI സോഫ്റ്റ്‌വെയറിന് പ്രധാനപ്പെട്ട പാറ്റേണുകള്‍ കണ്ടെത്താനും പരസ്പ്പരബന്ധങ്ങള്‍ കണ്ടെത്താനും കഴിയും, വിധിന്യായങ്ങളും അവര്‍ക്ക് ഉപയോഗിക്കാവുന്ന മുന്‍കൂര്‍ നിയമങ്ങളും നല്‍കിക്കൊണ്ട് അവരുടെ കേസില്‍ നിയമ പ്രാക്ടീഷണര്‍മാരെ സഹായിക്കും. ബള്‍ക്ക് കരാറുകള്‍ കാര്യക്ഷമമായും മനുഷ്യരേക്കാള്‍ വേഗത്തിലും അവലോകനം ചെയ്യാന്‍ ഇവക്ക് കഴിയും.

ഇലക്ട്രോണിക് ബില്ലിംഗ്

AI സാങ്കേതികവിദ്യയില്‍ നിയമപരമായ സോഫ്റ്റ്‌വെയര്‍ ഉപയോഗിക്കുന്നതിലൂടെ അഭിഭാഷകര്‍ നടത്തുന്ന ജോലികള്‍ക്കനുസരിച്ച് ഇന്‍വോയ്‌സുകള്‍ തയ്യാറാക്കാന്‍ ഉപകാരപ്പെടുന്നു. നിയമ പ്രാക്ടീഷണര്‍ ചെയ്യുന്ന ജോലിയുടെ കൃത്യമായ ബില്ലിംഗ് മനസ്സിലാക്കാന്‍ ഇത് സ്ഥാപനത്തെയും അഭിഭാഷകനെയും സഹായിക്കുന്നു. ചുരുക്കത്തില്‍, സാങ്കേതികവിദ്യയിലെ പുരോഗതി തീര്‍ച്ചയായും നിയമവ്യവസായത്തിന്റെ വീക്ഷണത്തെ മാറ്റിമറിച്ചേക്കും. നിയമരംഗത്ത് AI ക്ക് ധാരാളം നേട്ടങ്ങളുണ്ടെന്ന് തെളിയിക്കാന്‍ കഴിയും. അത് വേഗത്തിലുള്ള ഗവേഷണ പ്രവര്‍ത്തനങ്ങളില്‍ നിയമ പ്രൊഫഷണലുകളെ സഹായിക്കും. അതിന്റെ പ്രവചനാത്മക സാങ്കേതികവിദ്യ ഉപയോഗിച്ച് വിധികര്‍ത്താക്കളെ തീരുമാനമെടുക്കാന്‍ സഹായിക്കാനാകും. നടപടിക്രമങ്ങള്‍ നിര്‍മ്മിക്കുന്നത്, നിയമ സ്ഥാപനങ്ങള്‍ക്ക് ആവശ്യമായ ഉത്സാഹത്തോടെയുള്ള ജോലികള്‍ ചെയ്യുന്നത്, ഡാറ്റ ശേഖരണം നടത്തുന്നതിന് മുതലായവയ്ക്ക് ഇത് ഉപയോഗപ്രദമാണ്. ഇത് അവരുടെ ജോലി കൂടുതല്‍ കാര്യക്ഷമവും വേഗത്തിലുമാക്കുന്നു. മെഷീന്‍ ലേണിംഗ് സാങ്കേതികവിദ്യ സമയം ലാഭിക്കുന്നു, ഇത് കൃത്യവും ഫലപ്രദവുമാണ്. എന്നാല്‍, ഇതിന് തന്ത്രപരമായ ചിന്തയില്ല, അത് മനുഷ്യരെപ്പോലെ സര്‍ഗ്ഗാത്മകമല്ല, വൈകാരിക ബുദ്ധിയും സഹാനുഭൂതിയുടെ വികാരവും ഇല്ല എന്നു തുടങ്ങി നിയമവ്യവസായത്തില്‍ Al ഉള്‍പ്പെടുത്തുന്നതിന് മുന്നില്‍ ഇത്തരത്തില്‍ നിരവധി വെല്ലുവിളികളുണ്ടങ്കിലും അതിനെക്കാള്‍ പതിന്മടങ്ങ് ഉപകാരമാണ് ആര്‍ട്ടിഫിഷ്യല്‍ ഇന്റലിജന്‍സ് എന്ന പുത്തന്‍ പ്രക്രിയയിലൂടെ നടപ്പിലാക്കുന്നതെങ്കില്‍ അതിന്റെ പോരായ്മകളെ ഒരു വലിയ തടസ്സമായി കാലങ്ങളോളം ചര്‍വിത ചര്‍വണം നടത്തുന്നതില്‍ എന്ത് അര്‍ത്ഥമാണുള്ളത് ? അതിനാല്‍, സാങ്കേതിക മുന്നേറ്റങ്ങളില്‍ നിന്ന് പിന്തിരിഞ്ഞ് നില്‍ക്കുകയല്ല, മറിച്ച് അത് സ്വീകരിക്കുകയും ഉപയോക്താക്കളുടെ താല്‍പ്പര്യങ്ങള്‍ സംരക്ഷിക്കുന്നതിന് ആവശ്യമായ നിയമനിര്‍മ്മാണങ്ങള്‍ നടത്തി നമ്മുടെ നേട്ടത്തിനായി ഉപയോഗിക്കുകയും ചെയ്യുക എന്നതാണ് പരിഹാരം.


Reference:
^{1.ആര്‍ട്ടിഫിഷ്യല്‍ ഇന്റലിജന്‍സ് ; ലോ ആന്റ് പോളിസി ഇംപ്ലിക്കേഷന്‍സ്. by Purvi Pokhariyal, Amit K. Kashyap and Arun B. Prasad
2.ARTIFICIAL INTELLIGENCE: A MODERN APPROACH, 4TH EDITION. by Stuart Russell}