എഐ വിപ്ലവത്തിന്റെ കാലത്തിലൂടെയാണ് നമ്മൾ കടന്നു പോവുന്നത്. അമേരിക്കയിൽ നിന്നുള്ള ഓപ്പൺഎഐയുടെ ചാറ്റ്ജിപിടിക്ക്(OpenAI, ChatGPT) ശേഷം, ചൈനയിൽ നിന്നുള്ള ഡീപ്സീക്(DeepSeek) എന്ന എഐയും, അത് ലോകമാകെ നടത്തുന്ന വിപ്ലവത്തിനും നമ്മൾ ഇപ്പോൾ സാക്ഷിയായി. മനുഷ്യർക്ക് ഒരേ സമയം ഉപകാരവും ഉപദ്രവവുമാവുന്ന ഒരു സാങ്കേതികവിദ്യയാണ് എഐ എന്നാണ് പൊതുവെ പറയപ്പെടുന്നത്. പല ജോലികൾ എളുപ്പമാക്കുന്നതിലൂടെ ഉപകാരിയും, ഉള്ള ജോലി കളയുന്നതിലൂടെ ഉപദ്രവവുമായി എഐ മാറുന്നുവെന്നാണ് വാദം. അധികം ചർച്ചയൊന്നും ആവാതെ, വളരെ നിശബ്ദമായി എഐ മാറ്റിമറിച്ച, നമ്മൾ ദൈനംദിനം ഉപയോഗിക്കുന്ന ഒരു ഫീച്ചറുണ്ട് - ഇന്റർനെറ്റ് സെർച്ച്.

ഇന്റർനെറ്റ് സെർച്ച് ചെയ്യാത്ത ഒരു ദിവസം പല ആളുകളുടെയും ജീവിതത്തിൽ ഉണ്ടാവാനിടയില്ല. പ്രധാനമായും അതിന് ഗൂഗിൾ സെർച്ച് എൻജിൻ ആണ് ഉപയോഗിക്കുന്നതെങ്കിലും, മൈക്രോസോഫ്റ്റിന്റെ ബിങ്, യാഹൂ എന്നിവ ഉപയോഗിക്കുന്ന ഒരു ന്യൂനപക്ഷവും ലോകത്തുണ്ട്. ഇതിൽ ഗൂഗിൾ സെർച്ച് ഒരു ഉദാഹരണമായി എടുത്താൽ, ഇതിൽ എന്തെങ്കിലും സെർച്ച് ചെയ്യുമ്പോൾ, സെർച്ച് റിസൾട്ടിൽ ‘AI Overview’ എന്ന പേരിൽ ഒരു ചെറിയ വിശദാംശം ആദ്യമേ തന്നെ നമുക്ക് ഗൂഗിൾ സെർച്ച് എൻജിൻ നൽകുന്നുണ്ട്. നമ്മൾ സെർച്ച് ചെയ്ത കാര്യത്തെക്കുറിച്ച് മറ്റു ന്യൂസ് അല്ലെങ്കിൽ വെബ്സൈറ്റ് ലിങ്കുകൾ തുറക്കാതെ തന്നെ ആവശ്യമായേക്കാവുന്ന വിവരങ്ങൾ എഐ ഓവർവ്യൂവിലൂടെ ഗൂഗിൾ നമുക്ക് നൽകുന്നു. പല സന്ദർഭങ്ങളിലും നമ്മൾ തിരഞ്ഞതിന്റെ ഉത്തരം കിട്ടാൻ ഈ ഒരൊറ്റ ഓവർവ്യൂ മാത്രം മതിയാവും, കൂടുതൽ അതിനെക്കുറിച്ച് അന്വേഷിച്ച് പോവേണ്ട സ്ഥിതി വരില്ല. മാത്രമല്ല ഒരാളുമായി സംസാരിക്കുന്ന രീതിയിലുള്ള ഒരു കോൺവർസേഷനൽ(conversational) തലവും അതിനുണ്ടാവുന്നു എന്നത് ശ്രദ്ധേയമായ ഒരു ഫീച്ചറാണ്.

^{REPRESENTATIVE IMAGE | WIKI COMMONS}
പൊതുവേ ഗൂഗിൾ സെർച്ച് ചെയ്യുമ്പോൾ, നമ്മൾ അന്വേഷിക്കുന്ന കാര്യവുമായി ബന്ധപ്പെട്ട കീവേർഡുകൾ(keywords) നൽകുകയാണ് പതിവ്. ഒന്നോ രണ്ടോ വാക്കുകളിൽ അവ ചുരുങ്ങിയേക്കും. എങ്കിലും ആളുകളോട് സംസാരിക്കുന്ന രീതിയിൽ ഒരു മുഴു ചോദ്യം തന്നെ ടൈപ്പ് ചെയ്ത് സെർച്ച് ചെയ്യുന്നവരും ഉണ്ട്. പക്ഷേ AI വരുന്നതിന് മുൻപ്, നമ്മൾ സെർച്ച് ചെയ്യാൻ ഉപയോഗിച്ച വാക്കുകൾ ഇന്റർനെറ്റ് മുഴുവൻ നമ്മൾക്ക് വേണ്ടി ഗൂഗിൾ തിരഞ്ഞ്, അവ വരുന്ന വെബ്സൈറ്റ് ലിങ്കുകൾ നമ്മൾക്ക് മുന്നിൽ ഡിസ്പ്ലേ ചെയ്യും. ഇത് കൂടാതെ, ന്യൂസ്, ഇമേജസ്, മാപ്സ് എന്നിവയും ഉചിതമെങ്കിൽ നമ്മൾക്ക് നൽകും. ഇതിൽ നിന്നും നമ്മൾ വേണ്ടത് എടുക്കുന്നു.

എന്നാൽ ഇപ്പോൾ കീവേർഡ് നൽകാൻ കഴിഞ്ഞില്ലെങ്കിൽ, അത് അറിയില്ലെങ്കിൽ, അറിയുന്ന വാക്കുകളിൽ അത് വിശദീകരിച്ചാൽ, അത് മനസിലാക്കി, അതിനനുസരിച്ച് റിസൾട്ടുകൾ പ്രദർശിപ്പിക്കാനുള്ള ശേഷി ഇന്റർനെറ്റ് സെർച്ച് എൻജിനുകൾക്ക് ലഭിച്ചിരിക്കുന്നു. അതിന് അവയ്ക്ക് സഹായകമായിരിക്കുന്നത് എഐയും, സംഭാഷണ ശൈലിയിലുള്ള മറുപടികൾക്ക് മെഷീൻ ലേർണിംഗ് കൺസെപ്റ്റുകളുടെ(Machine Learning Concepts) ഭാഗമായി വരുന്ന എൽഎൽഎം(LLM) എന്ന ലാർജ് ലാങ്ഗ്വേജ് മോഡൽ(Large language Model) എന്ന ആശയവുമാണ്. എൻഎൽപി(NLP) എന്ന നാച്ചുറൽ ലാങ്ഗ്വേജ് പ്രോസസിങ്ങിന്(Natural Language Processing) എൽഎൽഎം ഉപയോഗപ്പെടുത്തുന്നു, എൻഎൽപിയിലൂടെ മനുഷ്യന്റെ സംസാരരീതിയിൽ എഐ മറുപടികൾ നൽകുന്നു.

^{REPRESENTATIVE IMAGE | WIKI COMMONS}
ഇതേ എൽഎൽഎം, എൻഎൽപി കൺസപ്റ്റുകൾ തന്നെയാണ് ചാറ്റ്ജിപിടി, ഡീപ്സീക് എന്നിവയുടെയെല്ലാം പുറകിൽ. അവയ്ക്ക് സംസാരശേഷിക്കുള്ള ഭാഷ നൽകുന്നത് എൽഎൽഎം ആണ്. ഇതേ എൽഎൽഎം തന്നെയാണ് മാറുന്ന ഇന്റർനെറ്റ് സെർച്ച് റിസൾട്ടുകളുടെയും പുറകിലുള്ളത്. മാറുന്ന ഇത്തരം സെർച്ചുകളെ കീവേർഡ് സെർച്ചിൽ നിന്നും കോൺവർസേഷണൽ സെർച്ച് എന്ന് വിളിക്കാൻ കഴിയും. മനുഷ്യർ പരസ്പരം ചോദ്യം ചോദിക്കുന്ന രീതിയിൽ നമ്മൾ ഗൂഗിളിനോടും, മറ്റ് എഐ ഉള്ള സെർച്ച് എൻജിനുകളോടും ഒരു ചോദ്യം ചോദിക്കുന്നു. മനുഷ്യർ മറുപടി നൽകുന്ന തരത്തിൽ എഐ ഓവർവ്യൂവിലൂടെ ഗൂഗിളും, മറ്റുള്ളവ അവയുടെ രീതിയിലും മറുപടി നൽകുകയും ചെയ്യും. എന്നിരുന്നാലും ആവശ്യമുള്ള ലിങ്കുകളും ഓവർവ്യൂവിന് ശേഷം ഗൂഗിൾ നൽകുന്നുണ്ട്. സെർച്ചിന്റെ കോർ ഫങ്ക്ഷണാലിറ്റി(core functionality) നിലനിർത്തുന്നുണ്ടെന്ന് സാരം.

ഒരുദാഹരണം പറയുകയാണെങ്കിൽ, വീടിന് മുന്നിൽ ഒരു പക്ഷിയെ കണ്ടെന്ന് കരുതുക, അതേത് പക്ഷിയാണെന്ന് കണ്ടെത്തണമെന്നും കരുതുക. അതിനായി നമ്മൾക്കതിന്റെ ഫോട്ടോ പകർത്തി ഗൂഗിൾ ലെൻസ് പോലെയുള്ള ടൂൾ ഉപയോഗിച്ച് കണ്ടെത്താൻ ശ്രമിക്കാം. ഗൂഗിൾ ലെൻസിന്റെ ഫങ്ക്ഷണാലിറ്റി ഇപ്പോ ഗാലറി ആപ്പുകളിൽ തന്നെ വന്നു തുടങ്ങിയിട്ടുണ്ട്, ഐഒഎസിലും ആൻഡ്രോയിഡിലും ഒരു പോലെ. പക്ഷേ ഫോട്ടോ പകർത്താൻ കഴിഞ്ഞില്ല എന്ന് കരുതുക, ഗൂഗിളിൽ പോയി പക്ഷിയുടെ നിറം, മറ്റു ഫീച്ചറുകൾ എന്നിവ നമ്മളാൽ കഴിയുന്ന വിധം വിശദീകരിച്ചാൽ, അത് കണ്ടെത്താൻ സെർച്ച് എൻജിന് കഴിയും. മറ്റൊരു ഉദാഹരണം എടുത്താൽ, ജപ്പാനിലേക്ക് ഒരു യാത്ര പോവണം എന്ന് വിചാരിക്കുക. എത്ര ദിവസമാണ് യാത്ര, എത്രയാണ് ബജറ്റ്, എന്തൊക്കെയാണ് ജപ്പാനിൽ കാണാനും അനുഭവിക്കാനും ആഗ്രഹിക്കുന്നത് എന്നൊക്കെ പറഞ്ഞാൽ, വിശദമായി ഒരു യാത്ര പ്ലാൻ തന്നെ തരാൻ സെർച്ച് എൻജിനുകൾക്ക് ഇന്ന് കഴിയും. ഇതിനായി ലൈവ് ആയിട്ടുള്ള ഡാറ്റയും വിവരങ്ങളും ഇന്റർനെറ്റിൽ നിന്നും എടുക്കുകയാണ് സെർച്ച് എൻജിനുകളും, അവ ഉപയോഗപ്പെടുത്തുന്ന എഐ മോഡലുകളും ചെയ്യുന്നത്. വളരെ ചുരുങ്ങിയ സമയത്തിൽ, സെർച്ച് ചെയ്യുന്നതിന്റെ റിസൾട്ടുകളായി വെബ്സൈറ്റ് ലിങ്കുകൾ തന്നിരുന്ന സെർച്ച് എൻജിനുകൾ ഇന്ന് അതിലും വേഗത്തിൽ ആവശ്യമുള്ള വിവരങ്ങൾ മാത്രം നൽകുന്ന തരത്തിലേക്ക് എത്തിച്ചേർന്നിരിക്കുകയാണ്.

^{REPRESENTATIVE IMAGE | WIKI COMMONS}
പക്ഷേ ഇതിന് പുറകിൽ പല അപകടങ്ങളും പതിയിരിക്കുന്നുണ്ട് എന്നുള്ളതും നമ്മൾ ശ്രദ്ധിക്കേണ്ടതാണ്. എഐക്കുള്ള എല്ലാ പ്രശ്നങ്ങളും സെർച്ച് എൻജിനുകൾ ഉത്തരം നൽകാൻ ഉപയോഗിക്കുന്ന എഐക്കുമുണ്ട്. ഒരു ചോദ്യത്തിനുള്ള ഉത്തരം എഐ മോഡലിന് കൃത്യമായി അറിയില്ലെങ്കിൽ അതിന് തോന്നിയ ഉത്തരം നൽകുക എന്നത് എഐ ചെയ്യുന്ന സ്ഥിരം കാര്യങ്ങളിൽ ഒന്നാണ്. എഐ ഹാലൂസിനേറ്റ്(hallucinate) ചെയ്യുന്നു എന്നാണ് ഇതിനെ പറയുന്നത്. അത് കൂടാതെ നമ്മൾക്ക് ഉത്തരം നൽകാൻ എഐ റഫറൻസ് എടുക്കുന്ന വെബ്സൈറ്റുകളിലെ വിവരങ്ങളിൽ തെറ്റുണ്ടെന്ന് കരുതുക, അതേ തെറ്റായ വിവരങ്ങളാണ് ഉത്തരമായി നമുക്ക് ലഭിക്കുന്നതും. ഇത് ശരിയാണെന്ന് വിശ്വസിച്ച് നമ്മൾ അതിനെ ഉപയോഗപ്പെടുത്തിയാൽ കൂടുതൽ അപകടങ്ങളിലേക്ക് അത് വഴിവയ്ക്കുകയും ചെയ്യും. പാറക്കല്ലുകൾ തിന്നാനും, പോയി മരിക്കൂ എന്നൊക്കെ എഐ പറഞ്ഞ പല വാർത്തകളും നമ്മൾ വായിച്ചിട്ടുള്ളതാണ്, റെഡിറ്റ്(Reddit) പോസ്റ്റുകൾ ഒക്കെയാണ് അത്തരം ഉത്തരം നൽകാൻ എഐ റഫറൻസ് ആയി ഉപയോഗിച്ചിട്ടുള്ളത്. ആളുകൾ അവർക്ക് തോന്നുന്ന അഭിപ്രായങ്ങളും ചിന്തകളും ഗൗരവമായും തമാശയ്ക്കും പങ്കുവയ്ക്കുന്ന സമൂഹമാധ്യമ പ്ലാറ്റ്ഫോം ആണ് റെഡിറ്റ്. ഇത് കൂടാതെ, ഉത്തരം നൽകുവാൻ എഐ മോഡലുകൾ റഫറൻസ് ഉപയോഗിക്കാനെടുക്കുന്ന വെബ്സൈറ്റുകൾ, ഓരോ സമയവും എങ്ങനെയാണ് തിരഞ്ഞെടുക്കുന്നത് എന്നതിനും കൃത്യമായ വിശദീകരണങ്ങൾ ഇല്ല. ഏത് വെബ്സൈറ്റിനെയോ, ആ വെബ്സൈറ്റുകൾ നൽകുന്ന ഏത് വിവരത്തെയാണോ എഐ മോഡലുകൾ ആശ്രയിക്കുന്നത് എന്നത് പലപ്പോഴും എഐ നിർമ്മിച്ച കമ്പനികൾക്കും അവയുടെ നിർമാതാക്കൾക്കും കൃത്യമായി വിശദീകരിക്കാൻ കഴിയാറില്ല.

എങ്കിലും എഐ സെർച്ചാണ് ഭാവി എന്നത് നൂറ് ശതമാനവും ഉറപ്പായ കാര്യമാണെന്നതിൽ ഒരു തർക്കവുമില്ല. അത് മനസിലാക്കിക്കൊണ്ട്, ഇതിനെപ്പറ്റി അറിയാൻ കുറച്ച് നേരം ഇന്റർനെറ്റ് സെർച്ചിൽ ചിലവഴിച്ചാൽ എല്ലാവർക്കും അത് ബോധ്യപ്പെടും. ഒരു കാര്യത്തെക്കുറിച്ച് തിരഞ്ഞ് സമയം കളയാതെ, ഉടൻ തന്നെ ഒരു ചുരുങ്ങിയ വിശദീകരണം ലഭിക്കുകയാണെങ്കിൽ പല സാഹചര്യത്തിലും പലർക്കും അത് മതിയാവും. ഇതിനായി ഏറ്റവും പുതിയ, ലൈവ് ആയിട്ടുള്ള വിവരങ്ങളും വാർത്തകളും എഐക്ക് ഉപയോഗിക്കാനാവും. ചാറ്റ്ജിപിടി ആരംഭിച്ച കുറച്ച് കാലം ലൈവ് വാർത്തകളും ഇന്റർനെറ്റും അതിന് ഉപയോഗിക്കാൻ കഴിയില്ലായിരുന്നു. അതിനെ പരിശീലിപ്പിക്കാൻ ഉപയോഗിച്ച വിവരം മാത്രമേ അതിന്റെ പക്കലുണ്ടായിരുന്നുള്ളൂ. ഇപ്പോഴാവട്ടെ ചാറ്റ്ജിപിടിക്ക് ഇന്റർനെറ്റിന് ആക്സെസ്(access) നൽകിയിട്ടുണ്ട് ഓപ്പൺഎഐ. ഗൂഗിളിന് അത് ആദ്യം മുതൽ തന്നെ ഉണ്ട്.

^{REPRESENTATIVE IMAGE | WIKI COMMONS}
ഇരുപത്തിയഞ്ച് വർഷത്തിലധികമായി ഇന്റർനെറ്റ് സെർച്ചിൽ ഗൂഗിളിന്റെ ആധിപത്യമായിരുന്നു. ഈ കാലയളവിൽ ഗൂഗിളിന് എന്തെങ്കിലും തരത്തിലുള്ള ഒരു വെല്ലുവിളി നേരിട്ടിട്ടുണ്ടെങ്കിൽ അത് ചാറ്റ്ജിപിടിയുടെ വരവോട് കൂടെയായിരുന്നു. ചാറ്റ്ജിപിടി ഒരു ചാറ്റ് ആപ്ലിക്കേഷൻ എന്ന രീതിയിൽ ആയിരുന്നെങ്കിൽ, ഇന്റർനെറ്റ് സെർച്ചിന് എഐ ഉപയോഗിക്കുന്നതിന്റെ മികച്ച ഉദാഹരണങ്ങൾ നൽകിയത് പെർപ്ലക്സിറ്റി(Perplexity) എന്ന ആപ്ലിക്കേഷൻ ആയിരുന്നു. പെർപ്ലക്സിറ്റി ഒരു എഐ സെർച്ച് എൻജിൻ ആണ്. ഒരു ദിവസത്തെ പ്രധാന വാർത്തകളെ സംഗ്രഹിച്ച് നല്കുകയും, ചുരുങ്ങിയ വാക്കുകളിൽ സെർച്ച് ചെയ്ത കാര്യങ്ങളെപ്പറ്റി വ്യക്തമായ ഉത്തരം നൽകുന്ന പെർപ്ലക്സിറ്റി, ഗൂഗിളിനെ വീണ്ടും എഐ വിഭാഗത്തിൽ വളരെ വേഗത്തിൽ കൂടുതൽ മുന്നേറ്റത്തിന് നിർബന്ധിതരാക്കി. അത്രത്തോളം മത്സരവും സമ്മർദ്ദവുമാണ് ഈ ചെറിയ എഐ ഫസ്റ്റ് (AI First) സ്റ്റാർട്ടപ്പ് സ്ഥാപനങ്ങളിൽ നിന്ന് ഗൂഗിൾ നേരിട്ടത്.

എഐ ആപ്ലിക്കേഷനുകൾക്ക് ഇന്റർനെറ്റ് സെർച്ച് ചെയ്യാനുള്ള ശേഷി ലഭിച്ചതോടെ പ്രശ്നത്തിലായിരിക്കുന്നതിൽ പ്രധാനികൾ മാധ്യമസ്ഥാപനങ്ങൾ കൂടെയാണ്. മാധ്യമങ്ങളുടെ വെബ്സൈറ്റുകളിലെ പല ആർട്ടിക്കിളുകളും പെയ്ഡ് പ്രീമിയം കോണ്ടന്റ്(Paid premium content) ആയിരിക്കുകയാണ് ഇന്നിപ്പോൾ. പക്ഷേ ഇത്തരം കോണ്ടന്റുകൾ ഉപയോഗപ്പെടുത്തി, അതിൽ നിന്ന് പോലും ഉത്തരങ്ങൾ നൽകുന്ന സംഭവങ്ങൾ പെർപ്ലക്സിറ്റിയിൽ ഉണ്ടായിട്ടുണ്ട്. അതിനാൽ ആരും ഈ മാധ്യമങ്ങളുടെ വെബ്സൈറ്റ് ക്ലിക്ക് പോലും ചെയ്യുന്നില്ല എന്നൊരു പ്രശ്നം എഐ ഓവർവ്യൂ പോലുള്ള ഫീച്ചറുകൾ മൂലമുണ്ടാവും. കോപ്പിറൈറ്റ്(copyright) ചെയ്തിട്ടുള്ള കോണ്ടന്റുകൾ ഉപയോഗിച്ചതിന് ഓപ്പൺഎഐക്കെതിരെ നിയമനടപടിക്ക് നീങ്ങിയിരിക്കുകയാണ് എൻഡിടിവി, നെറ്റ് വര്‍ക്ക്18, ഹിന്ദുസ്ഥാൻ ടൈംസ്, ഇന്ത്യൻ എക്സ്പ്രെസ് എന്നീ മാധ്യമങ്ങൾ.

^{REPRESENTATIVE IMAGE | WIKI COMMONS}
തെറ്റായ വിവരങ്ങൾ എഐ നൽകുന്നെന്ന പ്രശ്നത്തെ എളുപ്പം പരിഹരിക്കാം. എഐ നൽകുന്ന ഉത്തരങ്ങൾ പൂർണമായും വിശ്വസിക്കാതെ, അവരവരുടെ നിലയ്ക്ക് തുടരുന്ന ഗവേഷണങ്ങൾ തുടർന്ന്, അത്തരം വിവരങ്ങളൊക്കെ ശരിയാണെന്ന് ഉറപ്പ് വരുത്തുകയാണെങ്കിൽ ഇത്തരം അപകടങ്ങളെ വളരെ എളുപ്പത്തിൽ മറികടക്കാവുന്നതേയുള്ളൂ. പ്രീമിയം കോണ്ടന്റുകൾ ഉപയോഗിക്കുന്നുവെന്ന പ്രശ്നത്തെ പണക്കാരായ മാധ്യമസ്ഥാപനങ്ങൾ അവരുടേതായ നിലയിൽ കൈകാര്യം ചെയ്തോളും. ഇന്റർനെറ്റ് സെർച്ചിൽ എഐ കടന്നു വരുമ്പോൾ, ഗവേഷണം ചെയ്ത് വിവരങ്ങൾ കണ്ടെത്തുന്ന മനുഷ്യരുടെ ശേഷിയെ കുറയ്ക്കുകയും പരിമിതപ്പെടുത്തുകയും ചെയ്യും. ചെറിയ വീഡിയോകളായ ടിക്ടോക്, റീൽസ്, ഷോർട്സ് എന്നിവ കണ്ട് മനുഷ്യന്റെ ഏകാഗ്രതയുടെ ദൈർഘ്യം കുറഞ്ഞിരിക്കുന്നത് ഇന്നത്തെ ലോകത്ത് ശ്രദ്ധയിൽ വരേണ്ട പ്രധാന കാര്യങ്ങളിൽ ഒന്നാണ്. അവർക്കിപ്പോൾ ആർട്ട് സിനിമകൾ, കൂടാതെ മറ്റു സിനിമകളിലെ വേഗതയിൽ ചെറിയൊരു ഇടിവ് വന്നാൽ പോലും അവയെല്ലാം ലാഗ് ആണ്. ഇതിന് സമാനമായി, ഗവേഷണത്തിന്റെ കാര്യത്തിലും ഇത്തരം എഐ ഓവർവ്യൂവുകൾ മനുഷ്യരെ മടിപിടിപ്പിക്കാൻ കാരണമായേക്കും എന്നതിൽ സംശയമില്ല. വാട്സാപ്പ് ഫോർവേർഡുകൾ വെള്ളം തൊടാതെ വിഴുങ്ങുന്ന വലിയൊരു ജനക്കൂട്ടം ഇന്നും ഉണ്ടെന്ന് ഓർക്കണം.

വെറും ടെക്സ്റ്റിന്റെ കാര്യത്തിൽ മാത്രമല്ല. ചിത്രങ്ങൾ, വീഡിയോകൾ എന്നിവ സെർച്ച് ചെയ്യുന്നതിനും, അവയ്ക്കുള്ളിൽ അടങ്ങിയിട്ടുള്ള കാര്യങ്ങൾ വരെ സെർച്ച് ചെയ്യാൻ കഴിയുന്ന നിലയിലായിട്ടുണ്ട് എഐ ഇന്ന്. ഒരു ചിത്രത്തിലെ സ്ഥലമോ, ഡ്രസ്സോ തിരിച്ചറിയുകയും, അതേ പോലെ ഇവയെല്ലാം വീഡിയോക്കുള്ളിൽ പോലും പോയി സെർച്ച് ചെയ്യാൻ കഴിയുന്നതും മറ്റൊരു വിപ്ലവമാണ്. ഇന്റർനെറ്റിൽ ലഭ്യമായിട്ടുള്ള ചിത്രങ്ങളെയും വീഡിയോകളെക്കുറിച്ചും ഇത്തരത്തിൽ സെർച്ച് ചെയ്യാൻ നമുക്ക് കഴിയും. ഇന്റർനെറ്റ് സെർച്ച് ആകെമൊത്തത്തിൽ മാറിയിരിക്കുന്നു.

^{REPRESENTATIVE IMAGE | WIKI COMMONS}
ഇന്റർനെറ്റ് സെർച്ച് എൻജിനുകൾക്ക് പ്രവർത്തിക്കാൻ ആവശ്യമായി വന്നത് കീവേർഡുകളാണ് എന്ന നിലയിൽ നിന്ന് ഇന്ന് നമ്മളുടെ സൗകര്യത്തിന്, നമ്മുടെ ഭാഷയിൽ തന്നെ അവതരിപ്പിച്ച് സെർച്ച് ചെയ്യാൻ കഴിയുമെന്നത്, ചെറുതെന്ന് തോന്നാമെങ്കിലും വലിയ രീതിയിലുള്ള മാറ്റമാണ്. അതായത് സെർച്ച് എൻജിനുകളുടെ സൗകര്യത്തിന് നമ്മൾ നിൽക്കാതെ, നമ്മളുടെ സൗകര്യത്തിന് സെർച്ച് എൻജിനുകൾ മാറിയിരിക്കുന്നു. നേരെ ഉത്തരങ്ങൾ ലഭിക്കുകയാണെങ്കിൽ, ലിങ്കുകൾ കേറി ഇറങ്ങി സമയം ചിലവഴിക്കാൻ എത്ര പേരാവും ശ്രമിക്കുക? എന്തെങ്കിലും പഠിക്കണം എന്ന് കരുതുമ്പോൾ, നമ്മുടെ അറിവിന്റെ പരിമിതകളിൽ നിന്ന് കൊണ്ട്, നമ്മൾ ചോദിക്കുന്ന ഒരൊറ്റ ചോദ്യത്തിന്. ചുരുങ്ങിയ വാക്കുകളിൽ ഇന്റർനെറ്റിലൂടെ എഐ ഉത്തരം നൽകുമ്പോൾ, ഒരു കാര്യത്തെക്കുറിച്ച് പഠിക്കാൻ എത്ര സമയമാവും ചെലവാക്കേണ്ടി വരിക? കൂടുതൽ ആളുകളിലേക്ക് കോൺവർസേഷനൽ എഐ എത്തുമ്പോൾ മനുഷ്യന്റെ അറിവിന്റെ പരിധി എത്രത്തോളും വലുതാവും? പരിമിതികൾ എത്രത്തോളം ചെറുതാവും? ഇവയുടെയെല്ലാം ഉത്തരം ലഭിക്കാൻ പോവുന്ന, സാങ്കേതികവിദ്യയുടെ വിപ്ലവകരവും ആവേശകരവുമായ ഒരു യുഗത്തിന് നമ്മൾ സാക്ഷികളാവുന്നു.